ԱՄՆ նախկին նախագահ Դոնալդ Թրամփը Սպիտակ տնից հեռանալուց հետո առաջին անգամ խոշոր հանրահավաք կանցկացնի հունիսի 26-ին Օհայո նահանգում: Այս մասին ասված է ամերիկյան վարչակազմի նախկին ղեկավարի տարածած հայտարարության մեջ։ «ԱՄՆ 45-րդ նախագահ Դոնալդ Թրամփը հունիսի 26-ին խոշոր հանրահավաք կանցկացնի Օհայոյի Վելինգթոն քաղաքում»,- ասված է հաղորդագրության մեջ: Նշվում է, որ Save America (Փրկենք Ամերիկան) քաղաքական գործողությունների հանձնաժողովի հանրահավաքը կդառնա «շատերից առաջինն»՝ ի պաշտպանություն Հանրապետական կուսակցության թեկնածուների և «Make America Great Again» սկզբունքի: Առաջիկա միջոցառման նպատակն է լինելու հանրապետական Մաքս Միլերին աջակցելը, ով հաջորդ տարի մտադիր է Օհայոյից ընտրվել ԱՄՆ Ներկայացուցիչների պալատ: |