Այսօր Ստեփանակերտի Վերածննդի հրապարակում իրականացվել է բողոքի ակցիա՝ պահանջով, որպեսզի Արցախի նախագահ Արայիկ Հարությունյանը ներկայացնի հրաժարական: «Արցախցին Նիկոլ Փաշինյանին չի կարող շնորհավորել: Մենք չենք հետապնդում որևէ քաղաքական նպատակ, որևէ քաղաքական ուժ սա չի կազմակերպել: Ժողովուրդը եկել է՝ ասելու, որ Արայիկ Հարությունյանը պետք է հեռանա և թղթիկների վրա գրված է «Հեռացի՛ր, քանի որ դուք չեք արտահայտում արցախցու տեսակետը»»,- ասել է ակցիայի մասնակից քաղաքացին: Բողոքի ակցիային մասնակցող քաղաքացիներից մեկն էլ ելույթի ժամանակ ընդգծել է, որ ցանկանում է շարունակել ապրել և արարել Արցախում և ամենից ապահով վայրը նրա համար Արցախն է: «Ցավոք, մեր սիրելի Արցախի տարածքները գտնվում են թուրքերի վերահսկողության տակ, քանի որ կապիտուլյանտ Նիկոլ Փաշինյանը, Արցախի ոչ բարով կապիտուլյանտ Արայիկ Հարությունյանը պլանավորված ձևով 44-օրյա պատերազմի ընթացքում ամեն օր ստել և խաբել են Արցախի ժողովրդին՝ վստահեցնելով, որ ամեն ինչ լավ է»,- նշել է քաղաքացին: Հիշեցնենք, որ ընտրությունների գիշերն Արցախի նախագահ Արայիկ Հարությունյանը այցելել էր ՔՊ գրասենյակ: |