ԿԳՄՍ նախարարի պաշտոնակատար Վահրամ Դումանյանի հետ հանդիպումից հետո լրագրողների հետ զրույցում Պետական կամերային երաժշտական թատրոնի գլխավոր ռեժիսոր Սամսոն Ստեփանյանը նշել է, որ հանդիպումն իրենց չի հոգացրել. «Նախարարությունը ծրագիրը համարում է նորմալ, տրամաբանական, իրատեսական: Մենք պահանջեցինք չմիավորել մեզ Պարոնյանի թատրոնի հետ, որ քաղաքում կան բազմաթիվ տարածքներ, որ կարող են համապատասխանել սիմֆոնիկ նվագախմբի պահանջներին, որ ցանկալի չէ ոլորտների խնդիրները խառնել իրար»,- ասել է նա: Լրագրողի հարցին՝ հնարավո՞ր է որոշմանը նպաստած լինի ձեր նախկին գործընկեր, ներկայիս պատգամավոր Հրաչյա Հակոբյանը, Ստեփանյանն արձագանքել է. «Ո՞վ է Հրաչյա Հակոբյանը: Ես չեմ ճանաչում ո՛չ տենց պատգամավոր, ո՛չ տենց դերասան... Պողոսը ինչ-որ բան է ասում, ո՞վ է Պողոսը: Հետո՞ ինչ, որ պատգամավոր ա, էնքան փալաս պատգամավորներ կան: Եկեք չքաղաքականացնենք ամեն բան»: Ավելի վաղ հայտնել էինք, որ ԿԳՄՍ նախարարությունը պատրաստվում է միավորել Պարոնյանի անվան կոմեդիայի և Պետական երաժշտական կամերային թատրոնները, Կամերային թատրոնի շենքը հատկացնելով Հայաստանի պետական սիմֆոնիկ նվագախմբին, ինչին թատրոնների կոլեկտիվները դեմ են: |