Հունաստանի նախագահ Կատերինա Սակելարոպուլուն խոսել է Թուրքիայի նախագահ Ռեջեփ Թայիփ Էրդողանի՝ Կիպրոսի խնդրով արած վերջին հայտարարության ու Վարոշան բացելու նախաձեռնության մասին: Սակելարոպուլուն, ակնարկելով Թուրքիայի գործողությունները Կիպրոսի խնդրի հետ կապված, ասել է, որ Հունաստանը չի ընդունելու դրանք: Հայտնում է «Ermenihaber»-ը: «Թուրքիայի անօրինական գործողությունների ու ագրեսիայի դեմ պայքարում մենք վճռական ենք»,- եզրափակել է Հունաստանի նախագահը: Հիշեցնենք, որ հուլիսի 20-ին Էրդողանը Կիպրոսի թուրքական մասում հատարարել էր, որ թուրքական կողմն այլևս չի ընդունում լուծման նախկին՝ կղզու միավորման տարբերակները և առաջ է քաշել 2 առանձին պետությունների սկզբունքով լուծման իր տարբերակը: Էրդողանն ու Կիպրոսի թուրքական մասի ղեկավար Էրսին Թաթարը նաև հայտարարել էին Կիպրոսի Ֆամագուստա քաղաքի Վարոշա քաղաքամասի աստիճանական բացման ու բնակեցման մասին: Վարոշան 1974թ. թուրքական ներխուժումից հետո ցանկապատերով փակվել է ու առ այսօր անբնակ է։ |