ԱՄՆ ներքին անվտանգության նախարարությունը հայտարարել է անօրինական ներգաղթյալների ընտանիքների արագացված արտաքսման ընթացակարգը վերսկսելու մասին: Այս մասին ասված է գերատեսչության հայտարարության մեջ։ «Այսօրվանից (հուլիսի 26-ից), որոշ ընտանիքներ, ենթակա են արագացված արտաքսման: Արագացված արտաքսումն օրինական ընթացակարգ է այն ընտանիքների համար, որոնք օրինական հիմքեր չունեն ԱՄՆ-ի տարածքում գտնվելու համար»,- նշել են նախարարությունում: Ամերիկյան իշխանությունները նաև նախազգուշացրել են անօրինական կերպով ԱՄՆ ներխուժելու փորձերից: «Այդ գործողությունները վտանգավոր են և կարող են հանգեցնել երկարաժամկետ ներգաղթային հետևանքների այն անձանց համար, որոնք փորձում են դա անել»,- ասվում է հայտարարության տեքստում: Գերատեսչության պնդմամբ՝ ԱՄՆ-ի վարչակազմն աշխատում է անվտանգ, կարգավորված և հումանիտար ներգաղթային համակարգ ստեղծելու վրա: |