Պետական դավաճանության համար մեղադրվող արցախցի երիտասարդի նկատմամբ քրեական հետապնդումը դադարեցվել է։ Այս մասին հայտարարություն է տարածել Արցախի դատախազությունը։
«ԱՀ քաղաքացի Մ.Ա-ի գործողությունները մոլորության հետևանք էին, և վերջինիս մոտ բացակայում էր հանցավոր դիտավորությունը, ուստի նախաքննական մարմնի կողմից սույն թվականի հոկտեմբերի 13-ին որոշում էր կայացվել նրա արարքում հանցակազմի բացակայության հիմքով քրեական հետապնդումը դադարեցնելու մասին»,– հայտնում են դատախազությունից:

Հիշեցնենք` սեպտեմբերի 25-ին ԱՀ ազգային անվտանգության ծառայության կողմից հարուցվել էր քրեական գործ պետական դավաճանության հանցադեպով։ Ձերբակալվել էր ԱՀ քաղաքացի Մ.Ա.-ն` Ադրբեջանի հատուկ ծառայություններին կամ նրանց ներկայացուցիչներին` ադրբեջանցիների կողմից Ստեփանակերտ քաղաքում գտնվելու և ազատ տեղաշարժվելու տեսարաններ ներկայացնող տեսանյութեր տրամադրելու կասկածանքով: Նախաքննության ընթացքում նաև պարզվել է, որ նա միակը չէ, որ Ադրբեջանի հատուկ ծառայությունների թակարդն է ընկել։ Այլ արցախցիներ ևս տարբեր դրդապատճառներով կապ են հաստատել սոցիալական կայքերի «խոստումնալից» նոր ծանոթների հետ։
Սոցիալական ցանցերի մի շարք օգտատերեր, ովքեր կառավարվում են ադրբեջանական հատուկ ծառայությունների կողմից, ինտիմ շփումների, սիրային կապ հաստատելու կամ շահավետ բիզնես առաջարկելով հրապուրել են ու սերտ կապ ստեղծել արցախցիների հետ, ապա նրանց մոլորեցնելով խնդրել ու ստացել կամ փորձել են ստանալ Արցախի Հանրապետության մայրաքաղաքի հասարակական տարբեր վայրեր պատկերող տեսանյութեր ու լուսանկարներ` դրանք իբրև գովազդային կամ Արցախի Հանրապետության օգտին օգտագործելու կեղծ խոստումներով:

Հետագայում այդ տեսանյութերը մոնտաժելու և քարոզչական խոսք ավելացնելու եղանակով վեր են ածվել արցախցիներին ահաբեկելու, վախի մթնոլորտ ստեղծելու և տեղեկատվական գրոհ իրականացնելու գործիքի ու տարածել սոցցանցերով ու լրատվամիջոցներով: ԱՀ դատախազությունը մեկ անգամ ևս կոչ է անում զերծ մնալ սոցիալական ցանցերում կասկածելի օգտատերերի հետ շփումներից, նման իրավիճակներում հայտնվելու դեպքում անհապաղ տեղեկացնել ԱՀ ազգային անվտանգության ծառայությանը։