«Պաշտոնական տեղեկատվության համաձայն, ԱԺ նախագահի պաշտոնն զբաղեցնող Ալեն Սիմոնյանը, ՔՊ-ական պատգամավորների ու ԱԺ աշխատակազմի որոշ անդամների հետ մեկնել է ԱՄՆ: Ոչ պաշտոնական տեղեկատվությամբ, նա պատվիրակության կազմում ներառել է նաև իր կնոջը՝ օգտվելով ինքնաթիռի բիզնես դասի տոմսից: Հանրությանը ներկայացրեք, թե որքանո՞վ են իրականությանը համապատասխանում իմ կողմից նշված ոչ պաշտոնական տեղեկությունները»,- դիմելով ԱԺ փոխխոսնակ Հակոբ Արշակյանին՝ հարցրեց «Հայաստան» խմբակցության պատգամավոր Արեգնազ Մանուկյանը: Արշակյանն ասաց, որ բոլոր ծախսերը թափանցիկ են, այդ թվում՝ գործուղումների. «Կարող եք ցանկացած ժամանակ աշխատակազմից վերցնել ծախսերի բացվածքներն ու տեղեկանալ. գաղտնի որևէ գործուղում չկա»: Մանուկյանն ասաց, որ պատասխանը առնվազն «ծիծաղելի է». «Երբ ասում եք, որ ծախսերը թափանցիկ են, ես պաշտոնական հարցում եմ ուղարկել ու հետաքրքրվել, օրինակ, որքա՞ն գումար է ծախսվել կառավարական առանձնատան համար, որը վերանորոգվում է Ալեն Սիմոնյանի համար, ինձ պատասխանել են, որ ծախսերը գաղտնի են»: