Ֆրանսիայի ԱԳ նախարար Ժան-Իվ Լը Դրիանն անընդունելի է համարում Ադրբեջանի նախագահ Իլհամ Ալիևի հայտարարությունները Ֆրանսիայի նախագահի թեկնածու Վալերի Պեկրեսի մասին։ Ֆրանսիայի ԱԳՆ ղեկավարը նշել է, որ Ալիևի խոսքերը վերաբերում են Ֆրանսիայի նախագահի թեկնածուին, և դրանք «ձևով ու էությամբ անընդունելի են»։ Ժան-Իվ Լը Դրիանը հավելել է, որ այս մասին արդեն տեղեկացրել է Ֆրանսիայում Ադրբեջանի դեսպանին։ Ալիևն ավելի վաղ ասել էր, թե Պեկրեսի այցն Արցախ «սադրիչ էր և ուղղված էր Ֆրանսիայի նախագահ Էմանուել Մակրոնի դեմ, իսկ նպատակն՝ ընտրություններում հայերի ձայները ստանալն է»։ Ալիևը, «դատապարտելով» Ֆրանսիայի նախագահության թեկնածու Պեկրեսի այցն Արցախ, հայտարարել էր․ «Եթե իմանայինք, որ տիկին Պեկրեսն այնտեղ է, մենք նրան թույլ չէինք տա հետ գնալ»։ |