ՀՀ ԶՈՒ ԳՇ անձնակազմի կառավարման գլխավոր վարչության պետի տեղակալ Սահակ Սահակյանը լրագրողների հետ հարց ու պատասխանի ժամանակ ներկայացրեց 2022-ի հունիսի 13-ից մեկնարկած ամառային զորակոչի ընթացքին վերաբերող հարցերը, ԶՈՒ-ում կատարված ընթացակարգային և այլ փոփոխությունները: Նա նշեց, որ այս տարի նորակոչիկների վիճակահանությունը հեռարձակվում է բոլոր տարածքային ստորաբաժանումներում, և ծնողները հնարավորություն ունեն հետևելու վիճակահանոթյան ընթացքին: Հարցին, թե ինչու է հանվել Արցախում ծառայելու վիճակահանությունը, Սահակյանն ասաց. «Ռազմաքաղաքական ղեկավարության կողմից որոշում է կայացվել Արցախում իրականացնել միայն պայմանագրային զինծառայություն: Արցախի համար մշակվել է շատ լուրջ ու գրավիչ փաթեթ… Անկախ դրանից՝ հավաստիացնում եմ՝ Արցախի ռեսուրսի հիման վրա, պայմանագրային զինծառայողների համալրմամբ՝ այնտեղ ունենք բավարար քանակի զորք: Մեր վերջին ժամկետային զորակոչը 2020-ի ամռանն զորակոչն է, որը կզորացրվի հուլիսի 1-ից մինչև օգոստոսի 30-ը և այլևս Արցախում չենք ունենա ժամկետային զինծառայողներ»: Այս փոփոխության նպատակը, ըստ Սահակյանի, պայմանավորված է հնարավորության դեպքում ժամկետային զինծառայողներին առաջնագծից հանելով: «Հնարավորության դեպքում գենշտաբը բոլոր զորամիավորումներում փորձելու է նորակոչիկներին չընդգրկել մարտական հերթապահության մեջ: Նրանք հիմնականում զբաղվելու են պատրաստվածությամբ, իսկ անհրաժեշտության դեպքում պետք է կիրառվեն ըստ նշանակության»,- ասաց Սահակյանը: |