Հայաստանի 8 մարզերի 18 համայնքում տեղի են ունենում տեղական ինքնակառավարման մարմինների ընտրություններ։ Բերդ խոշորացված համայնքում ՏԻՄ ընտրությունների ընթացքին հետևելիս «168»-ը ֆիքսել է, որ գրեթե բոլոր ընտրատեղամասերում, բացի ծառայություն իրականացնող ոստիկաններից, հսկողություն էին իրականացնում նաև սև բերետավորները։ Ընտրական օրենսգրքի սահմանված կարգով «Ոստիկանության կենտրոնական և տարածքային մարմինները, դրանց ծառայություններն ու ստորաբաժանումները պարտավոր են ապահովել ընտրությունների անցկացման բնականոն ընթացքը, ընտրական հանձնաժողովների ու դրանց անդամների անկաշկանդ գործունեությունը»: Նախկինում որևէ ընտրության ժամանակ, իսկ ՏԻՄ ընտրություններին՝ մասնավորապես, ընտրատեղամասերի հարակից տարածքում ոստիկանության սև կամ կարմիր բերետավոր ծառայողներ հսկողություն չէին իրականացնում։ |