«Դա արհեստականորեն երկու պետությունների միջև հավասարության նշան դնելու քաղաքականության մաս է։ Եվ նրանք, որպես կանոն, չեն արձագանքում այն միջադեպերին, որոնք միակողմանի են։ Եթե նույնիսկ համարձակվել են և արձագանքել են, անպայմանորեն լինում է քաղաքական ճնշում Ադրբեջանի իշխանությունների կողմից և նրանք մեղքերը քավելու ուղիներ են գտնում»,- Ազատության եթերում ասաց ՄԻԵԴ-ում հայ ռազմագերիների հարցերով զբաղվող իրավապաշտպան Սիրանուշ Սահակյանը՝ մեկնաբանելով Հարավային Կովկասի հարցերով ԵՄ հատուկ ներկայացուցիչ Տոյվո Կլաարի գրառումը։ Իրավապաշտապանի խոսքով՝ նկատելի է, որ այդ հայտարարության հետևանքով գործադրվել է լրջագույն ճնշում այս պաշտոնյայի նկատմամբ, որից հետո սկսել են խոսել տեսանյութերի մասին։ |