«Դուք պատրա՞ստ եք հրաժարվել փոխադարձ իրարամերժ եզրույթներից, որոնք հետագա՝ իրար հանդուրժելն ու իրար հետ աշխատելը զրոյացնում են. է՛լ դավաճան, է՛լ սրիկա, թուրք, անցյալի թալանչի, էն կողմից էլ՝ գող»,- Հանրայինի եթերում դիմելով ԱԺ «Հայաստան» խմբակցության պատգամավոր Գեղամ Նազարյանին՝ հարցրել է հաղորդավար Պետրոս Ղազարյանը: Պատգամավորը նշել է, որ իր համար միշտ տհաճ է եղել, երբ քաղաքական քննարկումները վերածվում են վիրավորանքների. «Ինձ համար դա անընդունելի է... Մենք պետք է ոչ թե հանրությանը տուրք տանք, այլ փորձենք մենք թելադրել հանրությանը. սա խնդիր է, որը մի օրում չի լուծվի»: Պետրոս Ղազարյանն արձագանքել է. «Ականջներիս չեմ հավատում, որ ձեր ուժի ներկայացուցիչն էդպիսի բան է ասում, ուժ, որն իր լրատվամիջոցներով գեներացրել է այդ խոսույթը»: