«Կանայք՝ հանուն Արցախի» բողոքի ակցիայի մասնակիցները նամակ են հանձնել Հայաստանում ԵՄ պատվիրակությանը։ Այս մասին հայտնում է «Sputnik Արմենիա»-ն։ «Մենք այստեղ հավաքվել ենք մի խումբ կանանցով, որպեսզի միանանք Արցախի կանանց ու մայրերի կոչին և այս նամակը հանձնենք ԵՄ պատվիրակության ղեկավար, դեսպան Անդրեա Վիկտորինին, որպեսզի քայլեր ձեռնարկեն Արցախն ապաշրջափակելու և Ադրբեջանի տեռորիստական գործողությունը դադարեցնելու համար»,-ակցիայի ժամանակ ասել է ակցիայի նախաձեռնող Արաքսյա Գրիգորյանը։ Արցախի կանայք, մայրերը օրեր առաջ բաց նամակ էին հղել Եվրամիության հանձնաժողովի նախագահ Ուրսուլա ֆոն դեր Լայենին և պահանջել, որ նա իր գործողություններով նպաստի Արցախի ապաշրջափակմանը։ |