Մոլդովայի արտաքին գործերի և եվրոպական ինտեգրման նախարարությունը սպառնալից հռետորաբանություն է անվանել Ռուսաստանի արտգործնախարար Սերգեյ Լավրովի հայտարարությունը, թե Արևմուտքը Մոլդովան վերածում է «հաջորդ Ուկրաինայի»։ Հիշեցնենք՝ ՌԴ ԱԳ նախարարն ասել էր, որ Մոլդովայի ցանկությունը՝ միանալու արևմտյան տարբեր դաշինքներին՝ ՆԱՏՕ-ից մինչև ԵՄ, վկայում է Մոլդովայի իշխանությունների հակառուսական քաղաքականության մասին։ «Մենք կտրականապես մերժում ենք Սերգեյ Լավրովի հայտարարությունները, որոնք չեն համապատասխանում իրականությանը... Մոլդովայի ձգտումը՝ անդամակցելու այդ դաշինքներին, երկրի քաղաքացիների կողմից հաստատված և նրանց ցանկություններին համապատասխան ճանապարհ է: Մենք երախտապարտ կլինենք աշխարհի բոլոր երկրներին, ներառյալ Ռուսաստանի Դաշնությանը, մեր ժողովրդի որոշումը հարգելու համար։ Մոլդովայի Հանրապետությունը հստակ ընտրել է իր ապագան, և այդ ապագան ազատ աշխարհի մի մասը լինելն է»,- արձագանքել է Մոլդովայի արտաքին գերատեսչության ներկայացուցիչ Դանիել Վոդեն։ |