ՄԱՄՈՒԼ.ամ
Hay / Հայ | Рус | Eng | Tür
USD 402.56, EUR 440.64, RUB 4.58, GBP 505.01
+6 °C, +6 °C ... +8 °C Վաղը`+11 °C
Գագիկ Ծառուկյանը դադար է վերցրել․ Հիսուսի արձանի ճակատագիրն անհայտ է. «Հետք»
21:12, 02.02.2023 | mamul.am
5591 | 0

Հատիս լեռան վրա Հիսուսի արձանը կառուցելու մտադրության մասին Գագիկ Ծառուկյանի հայտարարությունից 7 ամիս է անցել, սակայն գաղափարի իրագործումը գործնական փուլ այդպես էլ չի մտել։

«Հետք»-ը տեղեկություններ է ստացել, որ Ծառուկյանն արձանի կառուցման ծրագիրն անորոշ ժամանակով դադարեցրել է։ Պարզաբանում ստանալու նպատակով գրավոր հարցմամբ դիմեցինք «Գագիկ Ծառուկյան» բարեգործական հիմնադրամի տնօրեն Անահիտ Ծառուկյանին։ Նախ հետաքրքրվեցինք, թե ինչու է դադարեցվել արձանի կառուցման ծրագիրը, ապա՝ արդյոք արձանի կառուցման այլ վայր է քննարկվում։ Անահիտ Ծառուկյանը մեր հարցերն անպատասխան թողեց։

Հատիսի գագաթին արձանի կառուցման ծրագրի դադարեցման մասին տեղեկությունը փորձեցինք ստուգել նաև պետական և համայնքային մարմիններից։

Ակունք խոշորացված համայնքի ղեկավար Հունան Ռուբենյանը հայտնեց, որ «Գագիկ Ծառուկյան» հիմնադրամը Հատիս լեռան վրա միայն ջրագիծ կառուցելու նախագծման թույլտվության համար է դիմել, որը ստացել է 2022 թ.-ի հուլիսին։

Շրջակա միջավայրի նախարարի տեղակալ Տիգրան Գաբրիելյանի խոսքով՝ նախարարությունում և նախարարության ենթակա կառույցներում «Գագիկ Ծառուկյան» բարեգործական հիմնադրամը Հատիս լեռան վրա կառուցապատում իրականացնելու վերաբերյալ դիմում չի ներկայացրել, հետեւաբար նախարարությունը եզրակացություն, համաձայնեցում կամ թույլատրող փաստաթուղթ չի տրամադրել։

Հատիսի գագաթին Հիսուսի արձանի կառուցման հիմնարկեքի արարողությունից հետո Գագիկ Ծառուկյանն իր երկու հարցազրույցներում փորձել է շրջանցել Հատիս լեռան վրա կառուցապատման հարցը։ Առաջին հարցազրույցում ( 2022 թ․-ի նոյեմբեր), որը բաղկացած էր երկու հարցից, Ծառուկյանը պատասխանում է իրեն քննադատող ակտիվիստներին՝ չպնդելով, որ Հիսուսի արձանը կառուցվելու է հենց Հատիս լեռան վրա։ Իսկ արդեն երկրորդ հարցազրույցում (2022 թ.-ի դեկտեմբեր), որն անհամեմատ ծավալուն էր՝ ոչ մի խոսք Հիսուսի արձանի կառուցման մասին։ Գործարարը միայն մի անորոշ հայտարարություն է անում առհասարակ կառուցելու, ինչ-որ բան ստեղծելու գաղափարի մասին։


Հատիսի նորահայտ սեփականատերերը

Չնայած նրան, որ Հատիսի վրա կառուցապատման ծրագիրը կանգ է առել, «Հետքը» լեռան սեփականատերերի նոր շրջանակ է պարզել։ 2022 թ.-ի ամռանը Հատիսի վրա հողակտորներ են ձեռք բերել Ակունք համայնքի ՔՊ-ական ղեկավար Հունան Ռուբենյանի հետ փոխկապակցված անձը և «Գազպրոմ Արմենիա»-ին պատկանող «Տրանսգազ» ՍՊԸ-ի մասնաճյուղի տնօրենը։

Ակունք համայնքի ավագանու, ապա համայնքի ղեկավարի 10.08.2022 թ.-ի որոշմամբ Հատիս լեռան վրա գտնվող 3 առանձին հողամաս վաճառվել է Վահե Արտաշեսի Օհանյանին։ Վահե Օհանյանն Աբովյանի քաղաքապետարանի «Կոմունալ տնտեսություն» ՀՈԱԿ-ի տնօրենի նախկին ժամանակավոր պաշտոնակատար Արտաշես Օհանյանի որդին է։ Վահե Օհանյանը Ակունքի համայնքապետարանում պարբերաբար հանդես է եկել որպես «Ալեքսանդր Ազիզյան Էդիկի» ԱՁ-ի տնօրեն։ Այդ ԱՁ-ն շահագործում է Ակունք գյուղում գտնվող «Բյուրակն» ռեստորանը։ «Ալեքսանդր Ազիզյան Էդիկի» ԱՁ-ի հիմնադիրը՝ Ալեքսանդր Ազիզյանը, Ակունք համայնքի ղեկավար Հունան Ռուբենյանի կնոջ` Աննա Ազիզյանի եղբայրն է։ Այս կապը հաշվի առնելով` կարելի է ենթադրել, որ Վահե Օհանյանը ձևական է հանդես գալիս որպես գնորդ, իրական գնորդը հենց համայնքի ղեկավարն է՝ Հունան Ռուբենյանը։ Ի դեպ, ուսումնասիրելով Ակունքի համայնքապետարանի կայքը՝ պարզեցինք, որ Վահե Օհանյանը տարբեր տարիների ձեռք է բերել Ակունք համայնքի սեփականություն հանդիսացած բազմաթիվ հողամասեր։ Բացի այդ, համայնքի ղեկավար Հունան Ռուբենյանի որդին՝ Ժորա Ռուբենյանը, 2021 թ.-ին Ալեքսանդր Էդիկի Ազիզյանից (ԱՁ-ի սեփականատիրոջից) 4 հողակտոր է նվեր ստացել։

Հունան Ռուբենյանը Ակունք համայնքը ղեկավարում 1996 թ.-ից։ Մինչև 2017 թվականը Ռուբենյանը Ակունք գյուղի գյուղապետն էր, դրանից հետո՝ Ակունք խոշորացված համայնքի ղեկավարը։ Նախկին ԲՀԿ-ական Հունան Ռուբենյանը 2022 թ.-ին Ակունք համայնքի ավագանու ցուցակը գլխավորում էր արդեն որպես «Քաղաքացիական պայմանագիր» կուսակցության անդամ։ «Ապագա կա» կարգախոսով մասնակցելով ընտրություններին՝ «ՔՊ»-ն Ակունք համայնքում ստացավ ընտրողների ձայների մեծամասնությունը, իսկ Հունան Ռուբենյանը ևս մեկ անգամ ստանձնեց համայնքի ղեկավարի պաշտոնը։

Հունան Ռուբենյանի հետ փոխկապակցված անձ Վահե Օհանյանը Ակունք համայնքի Կոտայք բնակավայրից Կապուտան բնակավայր տանող ճանապարհի աջակողմյան մասում 1.2 և 1.6 հա մակերեսով գյուղատնտեսական հողամասերը գնել է համապատասխանաբար 570 հազար և 760 հազար դրամով։ Այդ երկու հողամասերը Օհանյանը հետագայում միացրել է՝ դարձնելով 2.8 հա մակերեսով մեկ ամբողջական հողամաս։

Բացի այդ, Վահե Օհանյանը Հատիս լեռան վրա ձեռք է բերել 3.5 հեկտար մակերեսով գյուղատնտեսական հողամաս, որը գտնվում է «Գագիկ Ծառուկյան» բարեգործական հիմնադրամի հողակտորների հարևանությամբ (ոչ գագաթի հողերի)։ Այդ հողատարածքի համար Վահե Օհանյանը Ակունք համայնքի բյուջե վճարել է 1 միլիոն 383 հազար դրամ։

Հունան Ռուբենյանին գրավոր ներկայացրինք իր և Վահե Օհանյանի փոխկապակցվածության վերաբերյալ մեր ուենցած և վերը շարադրված փաստերը, դրանց վերաբերյալ մեզ մոտ ծագած ենթադրությունը, որ հողամասերի իրական սեփականատերը հենց համայնքի ղեկավարն է։ Ըստ Հունան Ռուբենյանի՝ Վահե Օհանյանը, հողամաս գնելով, իր սահմանադրական իրավունքն է իրացրել։ «Հարցման մեջ արծարծված «իրական սեփականատեր» արտահայտությունը անհասկանալի է, անհասկանալի է նաև, թե հարցման մեջ նշված ենթադրությունները ինչ հիմք ունեն»,- գրավոր պատասխանում նշել է Ակունք համայնքի ղեկավարը։

2022 թ.-ի օգոստոսին աճուրդով վաճառված հողամասերից մյուսը Ակունք համայնքի Կոտայք բնակավայրի վարչական տարածքում է, ունի 1.3 հա մակերես։ Գյուղատնտեսական նշանակությամբ այդ հողամասը 620 հազար դրամով գնել է Խորեն Զաքարի Զաքարյանը։ Խորեն Զաքարյանը «Գազպրոմ Արմենիա» ՓԲԸ-ին պատկանող «Տրանսգազ» ՍՊԸ-ի ստորգետնյա աշխատանքների մասնագիտացված մասնաճյուղի տնօրեն Արգիշտի Զաքարյանի հայրն է։ Խորեն Զաքարյանի գնած հողամասը Կոտայք գյուղից Կապուտան տանող ճանապարհի աջ մասում է, Վահե Օհանյանի հողամասի անմիջական հարևանությամբ։ Այդ հողամասի հարևանությամբ է գտնվում Հատիսի գագաթ տանող՝ նոր հարթեցված ճանապարհը։

Կիսվի՛ր այս նյութով՝
դեպի վեր