Թբիլիսիում Վրաստանի խորհրդարանի շենքի մոտ բողոքի ցույցը ցրելու համար իրավապահները ջրցան մեքենա և արցունքաբեր գազ են կիրառել։ Ուղիղ հեռարձակումներն իրականացվում են տեղական հեռուստաալիքներով։ Հատուկ նշանակության ջոկատայինները փակել են դեպի խորհրդարանի մուտք տանող փողոցը։ Արցունքաբեր գազի կրկնակի կիրառումից հետո կիրառվել է նաև ջրցան մեքենա։ Ռուսթավելի պողոտայում՝ շենքի ճակատի դիմաց, հազարավոր ցուցարարներ շարունակում են փողոց դուրս գալ այն բանից հետո, երբ խորհրդարանն առաջին ընթերցմամբ ընդունել է օտարերկրյա գործակալների մասին օրինագիծը։ Կան տուժածներ, նրանց բուժօգնություն է ցուցաբերվում։ ՆԳՆ ներկայացուցիչները հավաքվածներին բարձրախոսներով զգուշացնում են ցրվել, հակառակ դեպքում նրանց նկատմամբ «օրինական միջոցներ» կկիրառվեն։ Ցուցարարները չեն ենթարկվում ոստիկանների պահանջներին: «Օտարերկրյա ազդեցության թափանցիկության մասին» օրինագիծը խորհրդարան է ներկայացրել ընդդիմադիր «Ժողովրդի ուժ» շարժումը: Դրա համաձայն՝ առաջարկվում է ստեղծել ռեեստր այն հասարակական կազմակերպությունների, ԶԼՄ-ների և սուբյեկտների համար, որոնք ֆինանսավորման ավելի քան 20 տոկոսը ստանում են արտերկրից: |