Ուկրաինայում ռազմական գործողությունները կավարտվեն մեկ տարուց ոչ ուշ։ Այս մասին հայտարարել է «Վրացական երազանք՝ Ժողովրդավարական Վրաստան» իշխող կուսակցության հիմնադիր և պատվավոր նախագահ Բիձինա Իվանիշվիլին:

«Պատերազմը, որն ընթանում է Ուկրաինայում, կավարտվի ոչ ուշ, քան մեկ տարուց, իսկ եթե ԱՄՆ նախագահական ընտրություններում հաղթեն հանրապետականները, պատերազմը կարող է ավարտվել արդեն հունվարին»,- ասել է նա՝ կուսակցության նախընտրական արշավի պաշտոնական բացման ժամանակ:

Իվանիշվիլին նշել է, որ այն ժամանակ, երբ Ուկրաինայում ռազմական գործողություններն ավարտվեն, Թբիլիսիի և Բրյուսելի, ինչպես նաև Վաշինգթոնի միջև գոյություն ունեցող թյուրըմբռնումը կվերանա, և Վրաստանը կդառնա «գլոբալ քաղաքականության խաղացողների համար հետաքրքրության բոլորովին այլ առարկա»: Նրա խոսքով՝ մեկ տարի անց հիմնովին կփոխվեն ինչպես գլոբալ ու տարածաշրջանային շահերը, այնպես էլ Վրաստանի հետ կապված ծրագրերը։