Լրագրող Ոսկան Սարգսյանը գրում է. «Մարզպետն անտեղյակ է, որ Խաշթառակի ժամանակավոր կամուրջն ավելի քան մեկ շաբաթ գործում է:
Մայիսի 26-ին վարարած Աղստևը վնասել է Խաշթառակ և Լուսահովիտ գյուղերը միջպետական ավտոճանապարհին կապող կամուրջը, այն փակվել է երթևեկի համար։ Հիմնական կամրջից քիչ ներքև կառուցվել է ժամանակավոր կամուրջ, որը հուլիսին վարարած Աղստևը քանդել է։ Օգոստոսի 6-ին Տավուշի մարզպետ Հայկ Ղալումյանին հետևյալ հարցապնդումներն եմ արել՝

1. Ո՞ր կազմակերպությունը, ինչքա՞ն գումարով էր կառուցել Խաշթառակի ժամանակավոր կամուրջը,
2.Ո՞ր կազմակերպությունը, ինչքա՞ն ֆինանսավորմամբ, ե՞րբ է նորոգելու Խաշթառակի ժամանակավոր կամուրջը,
3. Նախատեսվո՞ւմ է վերանորոգել Խաշթառակի հիմնական կամուրջը, ե՞րբ, ո՞ւմ ֆինանսավորմամբ։

Օգոստոսի 14-ին մարզպետարանից պատասխանել են․ «Խաշթառակի ժամանակավոր կամուրջը կառուցվում է «Վեհ Իշխանասար» ՍՊԸ-ի կողմից և գտնվում է ավարտական փուլում: Ներկա պահին մեր կողմից ֆինանսական միջոցներ դեռևս չեն հատկացվել: Առաջիկա ծրագրերում նախատեսվում է Խաշթառակի հիմնական կամրջի փոխարեն կառուցել նոր կամուրջ»։ Մարզպետն անտեղյակ է, որ վերանորոգված Խաշթառակի ժամանակավոր կամուրջն օգոստոսի 6-ից գործում է։ «Տավուշ» հեռուստաընկերության տվյալներով՝ Խաշթառակի ժամանակավոր կամրջի շինարարության արժեքը 32 միլիոն դրամ է»։