Քաղաքական մեկնաբան Հակոբ Բադալյանի ֆեյսբուքյան գրառումը․ «Իրանի արտգործնախարար Աբաս Արաղչին Սիրիայի նախագահ Ասադի հետ հանդիպումից հետո արել է մի քանի ուշագրավ ձևակերպում: «Ես ունեցա օգտակար, անկեղծ եւ բարեկամական հանդիպում»,- Ասադի հետ հանդիպումից հետո հայտարարել է Արաղչին:
Ձեւակերպումները, բառերի ընտրությունն այդպիսի մակարդակներում բոլորովին պատահական չեն: Եվ այդ իմաստով ուշադրության է արժանի ԱՆԿԵՂԾ-ը: Իսկ ինչ, զրույցը կարող էր լինել ո՞չ անկեղծ: Իրանի արտգործնախարարի այդօրինակ ձեւակերպումն անշուշտ արտահայտում է այն, որ զրույցի ընթացքում Ասադին կամ փոխանցվել է շատ առանձահատուկ մի ազդակ, որն Ասադի համար կարող էր չլինել հաճելի, բայց Իրանի համար՝ անհրաժեշտ, կամ էլ Իրանի արտգործնախարարը Ասադին փոխանցել է Իրանի որեւէ դժգոհություն:
Արաղչին «հիացմունք» է հայտնում Ասադի տղամարդկային եւ վճռական կեցվածքով, հայտնելով նաեւ, որ հանդիպմանը ձեռք են բերվել կարեւոր պայմանավորվածություններ:
Արաղչիի հանդիպումն ու դրանից հետո ձեւակերպումները հուշում են, կարծես թե, այն մասին, ինչի վերաբերյալ արտահայտվել էի առավոտյան՝ մատնացույց անելով, որ Սիրիայում լարումը տեղի է ունենում Լիբանանում հրադադարի համաձայնությանը զուգահեռ: Այսինքն, բոլորովին բացառելի չէ այն, որ Իրանի «բարեփոխիչների» կառավարությունը Սիրիան որոշակի ծավալով «ներառել» է լիբանանյան պայմանավորվածությունների փաթեթում»: