«Ես անգիր տիրապետում եմ քաղաքական հետապնդման բոլոր տարատեսակներին, որովհետև անցել եմ գրեթե բոլոր հնարավոր հոդվածներով, որ քաղաքական պատճառներով օգտագործվում է Հայաստանում: Ինչ արել եմ, արել եմ գիտակցաբար՝ առանց որևէ րոպե փոշմանելու»,- «Իմնեմնիմի»-ի գործով դատական նիստի ժամանակ ասաց փոդքաստի համահեղինակ Նարեկ Սամսոնյանը: Սամսոնյանը ընդգծեց, որ քաղաքական քննադատությունը այս երկրում ներմուծվել է 2018 թվականից և, «այդ ներմուծողները ոչ միայն քրեական հետապնդման չեն ենթարկվել, այլ մինչ օրս շարունակում են նույն գործելաոճը՝ ավելի վատ բառապաշարով»: «Թե մենք կոպիտ ու կոշտ քննադատություն ենք իրականացնում, որոշները սեռական բնույթի հայհոյանքներով են դա անում»,- նշեց Սամսոնյանը՝ հավելելով. «Ես որևէ քրեական հանցագործություն չեմ կատարել, քանի որ եթե ես կատարել եմ, ուրեմն ՀՀ-ում նվազագույնը իշխանության բավականին բարձրագույն ներկայացուցիչներ պետք է վաղուց դատված լինեին այս հոդվածով»:
Հիշեցնենք, որ Նարեկ Սամսոնյանը և Վազգեն Սաղաթելյանը մեղադրվում են «Իմնեմնիմի» հաղորդաշարում Փաշինյանի հասցեին գնահատականներ հնչեցնելու համար։