Հայաստանում կառուցապատող ընկերությունների խնդիրներից գերկարևորները վերաբերում են մատակարար կազմակերպություններ-կառուցապատողներ խնդիրներին, մասնավորապես, «Վեոլիա ջուր», «Գազպրոմ Արմենիա», «Հայաստանի էլեկտրական ցանցեր» ընկերությունների հետ հարաբերություններում խնդիրներին։ Այս մասին լրագրողների հետ զրույցում հայտարարել է Կառուցապատողների ասոցիացիայի նախագահ Գուրգեն Գրիգորյանը։ Նրա խոսքով, երկրորդ խումբ խնդիրները, որոնք մշտական են, և կարելի է ասել՝ վերջ չունեն, դրանք պետական և համայնքային իշխանության մարմինների կողմից իրականացվող վարչարարություննների ընթացքում ժամկետների ձգձգումներն ու ուշացումներն են, իսկ ինչպես հայտնի է՝ կառուցապատման ծրագրերը յուրաքանչյուր օրվա համար արժենում են գումար։
Մեկնաբանելով անշարժ գույքի գների հնարավոր փոփոխությունները, Գուրգեն Գրիգորյանն ասաց. «Վերջին տարիներին գները միայն ու միայն բարձրանում են, կառուցապատման ծրագրերում շինարարության ինքնարժեքը թանկանում է։ Դա մի կողմից պայմանավորված է միջազգային շուկաներում ապրանքների և նյութերի գներով, մյուս կողմից՝ պետության կողմից վարվող քաղաքականությամբ, մասնավորապես հանրային ծառայություններ մատուցող կազմակերպությունների, գազի, ջրի, հոսանքի միացումների հետ կապված լրացուցիչ ծախսերի, որոնք չկային, կամ էականորեն քիչ էին, իսկ հիմա տասնապատիկ, հարյուրապատիկ անգամներ մեծ են»։