Meta-ի հիմնադիր Մարկ Ցուկերբերգը բլոգեր Ջո Ռոգանի հետ փոդքաստում ասել է, որ ԱՄՆ-ի հետախուզական գործակալությունները մեսենջերների հաղորդագրություններ մուտք գործելու «բազմաթիվ եղանակներ» ունեն, թեև գաղտնագրումն ինքնին, ինչպես Signal-ում կամ WhatsApp-ում, մնում է հուսալի:

Քննարկումն սկսվել է հեռուստահաղորդավար Թաքեր Քարլսոնի հիշատակումից հետո, ով մեղադրել էր հետախուզական գործակալություններին իր Signal մեսենջերի հաղորդագրությունները կարդալու համար, ինչը, ըստ նրա, թույլ է տվել նրանց իմանալ Վլադիմիր Պուտինի հետ հարցազրույցի իր պլանների մասին:

Ցուկերբերգը բացատրել է, որ քիչ հավանական է, որ հետախուզական ծառայությունները կոտրեն Signal-ը, քանի որ դրա գաղտնագրման մակարդակը բարձր է: «Signal-ը, ինչպես WhatsApp-ը, օգտագործում է սովորական բաց կոդով ծածկագրում, ինչը տեխնիկապես անհնար է դարձնում սերվերների միջոցով հաղորդագրությունների հասանելիությունը նույնիսկ հենց Meta-ի համար»,- ասել է նա:

Այնուամենայնիվ, նա ընդգծել է, որ նամակագրության հասանելիությունը կարելի է ձեռք բերել հենց օգտատիրոջ սարքը կոտրելու միջոցով։ «ԱԱԾ-ն կամ ԿՀՎ-ն, հավանաբար, շատ ուղիներ ունեն դա անելու համար: Եթե հեռախոսը կոտրվում է, ապա գաղտնագրումն այլևս պաշտպանիչ չէ»,- նշել է Meta-ի հիմնադիրը:

Ի վերջո, Ցուկերբերգն օգտատերերին խորհուրդ է տվել ջնջել հաղորդագրությունները, որպեսզի նվազագույնի հասցվի օտարների ձեռքն ընկնելու վտանգը, եթե իրենց սարքը կոտրեն: