Այսօր` օրվա երկրորդ կեսին, առանց բացատրության MAMUL.am լրատվականի խմբագրություն է ներխուժել ՀՀ ոստիկանության շուրջ 12 աշխատակից: Վերջիններն առանց բացատրության և իրավական փաստաթղթերի առգրավվել են խմբագրության երկու համակարգիչ, իսկ խմբագրության տնօրեն Ս. Մելիքյանին բերման ենթարկել ոստիկանության գլխավոր վարչության շենք: Շուրջ մեկուկես ժամ անհասկանալի հարցերից, անօրինական, նույնիսկ տարօրինակ հարցադրումներից և ազատ խոսքի տարածման դեմ բռնանալու անհույս փորձերից հետո ոստիկանության աշխատակիցները ներողություն հայցելով բաց են թողել խմբագրության տնօրենին: Իր հերթին խմբագրության տնօրեն Ս. Մելիքյանը պահանջել է բացատրություն՝ ոստիկանության ապօրինի վարքագծի և բերման ենթարկելու վերաբերյալ, ինչին ոստիկանությունը պատասխանել է, որ իրենք «բերման չեն ենթարկել, այլ հրավիրել են»: Հարցի վերաբերյալ MAMUL.am լրատվականն սկսելու է իրավական գործընթաց և ներգրավելու է միջազգային և հասարակական կազմակերպություններին: Ի պատասխան ոստիկանության անօրինական գործողությունների` MAMUL.am լրատվական գործակալությունը տեղեկացնում է, որ ոստիկանության անհավասար վարքը և անօրինական գործողությունները ցանկացած լրատվամիջոցի դեմ խստորեն դատապարտելի են և հրավիրում է հասարակական կազմակերպությունների և իրավապաշտպան մարմինների ուշադրությունը: Ավելին, տեղեկացնում ենք ՀՀ ոստիկանությանը, որ մարդու իրավունքների, խոսքի ազատության և հանրության տեղեկացված լինելու իրավունքի խախտման ցանկացած դրսևորում ներկայացվելու է հանրության դատին: Տեղի ունեցած միջադեպի առիթով առաջիկայում կտրվեն մանրամասներ: |