Հունիսի 26-28-ը մայրաքաղաքում անցկացվող «Սանկտ Պետերբուրգի օրերը Երևանում» ծրագրի շրջանակում տեղի է ունեցել «Երևան-Սանկտ Պետերբուրգ. Քաղաքային զբոսաշրջության զարգացման հեռանկարները» խորագրով կլոր սեղան-քննարկում: Հանդիպմանը ներկա են գտնվել Երևանի քաղաքապետարանի աշխատակազմի տուրիզմի բաժնի պետ Գևորգ Օրբելյանը, Սանկտ Պետերբուրգի տուրիզմի զարգացման կոմիտեի «Քաղաքային զբոսաշրջային տեղեկատվական բյուրոյի» կազմակերպչական բաժնի պետ Յուլիա Սախարովան, տուրիստական ընկերությունների, հյուրանոցների ներկայացուցիչներ:

Հանդիպման ընթացքում ներկայացվել են «Երևան 2800» հոբելյանական միջոցառումների զբոսաշրջային բաղադրիչ ներառող ծրագրերը, քննարկվել Երևանի և Սանկտ Պետերբուրգի զբոսաշրջային ներուժի ընդլայնման, սոցիալական գովազդների փոխանակման, բժշկական զբոսաշրջության զարգացման և այլ համատեղ ծրագրերի մշակման հնարավորությունները:
Ներկայացնելով զբոսաշրջության զարգացման ուղղությամբ տարվող աշխատանքները՝ Գևորգ Օրբելյանն ընդգծել է Երևանում «Զբոսաշրջային տեղեկատվական աջակցության և քաղաքացիների սպասարկման կենտրոն» -ի բացման կարևորությունը քաղաքային զբոսաշրջային հնարավորությունները ներկայացնելու տեսակետից և առաջարկել է գործընկեր քաղաքների համագործակցության շրջանակում առաջիկայում նախատեսել նոր նախագծեր և փորձի փոխանակման ծրագրեր:
Սանկտ Պետերբուրգից ժամանած պատվիրակության անդամներն էլ նշել են, որ Երևանը դիտարկում են որպես զբոսաշրջության նախընտրելի ուղղություն և կարևորում փոխադարձ համագործակցությունը:

Երևանի քաղաքապետարանի տեղեկատվության
և հասարակայնության հետ կապերի վարչություն