Նոյեմբերի 19-ին վարչապետի պաշտոնակատար Նիկոլ Փաշինյանն այց կատարեց Գեղարքունիքի մարզ: Այցի 1-ին կանգառը Մարտունի քաղաքն էր, որտեղ Նիկոլ Փաշինյանը մասնակցել է բնակավայրի 190-ամյակին նվիրված միջոցառումներին: Այցի հաջորդ հասցեն Գավառ քաղաքն էր: Գեղարքունիքի մարզպետարանում վարչապետի պաշտոնակատարաը հանդիպել է մարզի համայնքների ղեկավարներին և դպրոցների տնօրեններին, անդրադարձել առաջիկա քաղաքական գործընթացներին, մասնավորապես` խորհրդարանական ընտրություններին: Վարչապետի պաշտոնակատարը համայնքների ղեկավարներին հորդորել է առանձնահատուկ վերաբերմունք ցուցաբերել պոտենցիալ ներդրողներին, ովքեր նպատակ ունեն ստեղծելու նոր աշխատատեղեր: Օրվա երկրորդ կեսին այցը շարունակվել է Սևան համայնքում: Վարչապետի պաշտոնակատարը Գեղարքունիքի մարզպետ Գնել Սանոսյանի և Սևան համայնքի ղեկավար Սարգիս Մուրադյանի ուղեկցությամբ այցելել է նորակառույց ֆուտբոլի մարզադաշտ, որը կհանձնվի շահագործման մոտ օրերս: Ֆուտբոլի մարզադաշտը Հայաստանի ֆուտբոլի ֆեդերացիայի և Սևան համայնքի համագործակցության արդյունքն է, որը կառուցված է ժամանակակից չափորոշիչներին համապատասխան և խթանելու է ֆուտբոլի զարգացումը ոչ միայն Սևանում, այլ նաև տարածաշրջանում: Սևան համայնքի ղեկավարը Նիկոլ Փաշինյանին ներկայացրել է իրականացվող աշխատանքների ծավալը, խոսել այս տարի ստեղծված «Յունիոր Սևան» ֆուտբոլային թիմի հաջողությունների մասին, ներկայացրել առաջիկա ծրագրերը: Վարչապետի պաշտոնակատարը զրուցել է նաև համայնքի բնակիչների հետ, պատասխանել նրանց հուզող մի շարք հարցերի, տվել պարզաբանումներ: Ա. ՂՈՒԿԱՍՅԱՆ |