Զաքարիա 3-րդին հաջորդել է իր եղբորորդին՝ Ստեփանոս 4-րդ կաթողիկոսը կամ Ստեփանոս Դ Տղան (1464 - 1489) : Սա ևս կարողացել է կարճ ժամանակով բազմել Էջմիածնի կաթողիկոսական գահին: Ավելին, նա մտադրվել է, Ջահանշահի աջակցությամբ, վերականգնել Արծրունյաց թագավորությունը: Անշուշտ, թագավոր պիտի ընտրվեր «արքայազն» կաթողիկոսի մերձավոր ազգականներից մեկը: 1465 թվականին ամիրա Գուռջիբեկի որդի Սմբատն իր կաթողիկոս եղբոր ձեռամբ թագավոր է օծվել: Հայոց այս վերջին թագավորիկի իշխանության ներքո են եղել Աղթամար կղզին և կղզու դիմացի ափին գտնվող մի քանի գյուղ: Կղզու միակ բնակավայրում, որ քաղաք է անվանվել (այն ժամանակ կղզին համեմատաբար մեծ է եղել), շուրջ 600 մարդ է ապրել: |