![](https://mamul.am/images/pics/170713/gyumru-vorosh-mankap-u70975-1.jpg)
Ներկայում Գյումրու 2-3 համայնքային մանկապարտեզներում աշխատակազմի եւ տնօրենի միջեւ հարաբերությունները լարված են: Պատճառն այն է, որ դայակները` դաստիարակչուհիների օգնականները, որոշ ժամանակ օգտվել են երեխաների սննդից, կերակուրներից: Մանկապարտեզների օրական մթերքից իրենց համար առանձացրել են բաժին եւ դրանով ճաշ պատրաստել` խոհարարի գիտությամբ: Հետաքրքիրն այն է, որ այս մանկապարտեզների տնօրենները նոր են գլխի ընկել եւ որոշել պատժել դայակներին: Մեր տեղեկություններով` ավագ խմբի երեխաներն են ծնողներին պատմել դայակների քեֆ-ուրախությունների մասին, ծնողներն էլ իրենց հերթին տեղեկությունները փոխանցել են մանկապարտեզների դաստիարակչուհիներին, վերջիններս էլ` տնօրեններին: Տնօրեններն էլ որոշել են խայտառակ չլինելու համար պատժել դայակներին` բանավոր նկատողություն անել, ապա փորձել աշխատանքից ազատելու պատիժը կիրառել: Դայակներն էլ, իրենց հերթին, պատրաստվում են բողոքել տնօրենների դեմ` նշելով, որ խստապահանջ են, անիրազեկ, ինքնագլուխ եւ այլն: Դայակներից մեկը, ում անուն-ազգանունն իր խնդրանքով չենք հրապարակում, հաստատում է, որ օգտվել է երեխայի սննդից (ոչ մնացորդից): -Մեր աշխատանքը սկսվում է 8 անց կեսից, աշխատում ենք մինչեւ ժամը 4-5-ը: Մենք գիտենք, որ դայակներն իրավունք ունեն սնվել մանկապարտեզում` երեխաների հաշվին: Մենք միշտ այդպես ենք գիտեցել, -ասում է դայակը: Նույն խնդիրը եղել է նաեւ մի քանի մանկապարտեզում: Դայակների` մանկապարտեզների երեխաների սննդից օգտվելը չի արդարացվում, ավելին` դայակների արածն անթույլատրելի է եւ այս խնդրով տնօրեններն իրավունք ունեն զբաղվել, պատիժ սահմանել: Գյումրու քաղաքապետարանի կրթության բաժնի պետ Հայկ Սուլթանյանը եւս հայտարարում եւ հաստատում է` դայակներն իրավունք չունեն օգտվել երեխաների սննդից: Մանկապարտեզներն ունեն հանգստի ժամեր, բացի այդ դայակներն ունեն հերթափոխներ եւ վերջիններս իրենց սնվելու հարցը կարող են լուծել այդ ընթացքում (հերթափոխի կամ հանգստի), բայց ոչ` երեխաների հաշվին: Գյումրու մանկապարտեզների սնունդը գնվում է երեխաների ծնողների վարձավճարներով, մանկապարտեզների շենքերի պահպանման, ջեռուցման եւ այլ ծախսերը եւս հոգում են ծնողները:
|