Այս օրերին շատ է գրվում և խոսվում, որ 2020 թվականին մեր բանակում 13 զինվոր է զոհվել։ Նրանք չեն զոհվել հակառակորդի կրակոցից։ Չպարզված հանգամանքներ են նշվում նախարարության հաղորդագրություններում։ Հասարակությունը խիստ վրդոհված է և լրջորեն անհանգստացած: Այո, փողոցային բարքերը և վերջին շրջանում հասարակության մեջ առկա ատելության դրսևորումները, ցավոք, ներթափանցել են նաև Հայաստանի զինված ուժեր, Հայոց բանակ: Այստեղ շատ մեծ անելիքներ ունենք նաև մենք՝ մանկավարժներս և երիտասարդներին զինվորական գործին պատրաստող զինղեկներս: Հարկ ենք համարում նշել, որ նախնական զինվորական պատրաստվածության դասաժամերին ուսանողներին, երիտասարդներին պետք է ծանոթացնենք ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԶԻՆՎԱԾ ՈՒԺԵՐԻ ԿԱՐԳԱՊԱՀԱԿԱՆ ԿԱՆՈՆԱԳՐՔԻՆ, որով սահմանվում է զինվորական կարգապահության հասկացությունը, սկզբունքները, զինվորական կարգապահության պահպանման հետ կապված զինծառայողների պարտականությունները, զինծառայողներին տրվող խրախուսանքի և կարգապահական տույժերի տեսակները, դրանք կիրառելու կարգն ու պայմանները, հրամանատարների և այլ պաշտոնատար անձանց իրավունքները դրանց կիրառման գործում, ինչպես նաև կարգավորում է զինվորական կարգապահության ամրապնդման հետ կապված այլ հարաբերություններ: Զինվորական կարգապահությունը յուրաքանչյուր զինծառայողի կողմից Հայաստանի Հանրապետության Սահմանադրությամբ, սույն օրենքով, այլ օրենքներով ու զինված ուժերում գործող այլ կանոնագրքերով, ինչպես նաև հրամանատարների` իրենց լիազորությունների շրջանակներում տված հրամաններով սահմանված պարտականությունների և կարգուկանոնի խստիվ ու ճշգրիտ պահպանումն է: Զինվորական կարգապահությունը հիմնվում է օրինականության, մարդու իրավունքների և ազատությունների հարգման, հրապարակայնության, խրախուսման ու կարգապահական պատասխանատվության անխուսափելիության և անհատականացման, զինծառայողների զինվորական, իրավական ու բարոյական դաստիարակության սկզբունքների վրա: Զինվորական կարգապահությունն ապահովվում է յուրաքանչյուր զինծառայողի կողմից Հայաստանի Հանրապետության պաշտպանության, զինվորական պարտքի և իր պարտականությունների կատարման համար անձնական պատասխանատվության գիտակցմամբ, ինչպես նաև հրամանատարների կողմից իրենց լիազորությունների շրջանակներում տրված հրամանների ճշգրիտ ու ժամանակին կատարմամբ: Իմ կարծիքով այս քայլերը բավականին կլուծեն խնդիրները և զգալիորեն կչեզոքացնեն վտանգները, կնպաստեն կրճատել բանակում սպանությունների և ինքնասպանությունների դեպքերը: Կիսում եմ կորստյան ծանր վիշտը և իմ զորակցությունը հայտնում մահացած զինծառայողների ընտանիքի անդամներին, հարազատներին և ծառայակիցներին: Վլադ Ավագյան Աբովյանի N1 արհեստագործական պետական ուսումնարանի զինղեկ, գնդապետ |