«20» թիվը բաբելոնացիների դիցարանի գլխավոր աստվածներից մեկին՝ արևի աստված Շամաշին խորհրդանշող թիվն է եղել: Այս թիվը նույն նշանակությունն է ունեցել նաև ամերիկյան մայաների կրոնում: Հոմերոսի «Ոդիսական» -ի գլխավոր հերոսը՝ Ոդիսևսը, իր լաստանավի համար 20 ծառ է կտրել: «20» -ը վերծանվում է որպես կրկնապատկված «տասը»: Հին կելտերը «40» թիվը երկու անգամ «20» -ն են համարել: Ֆրանսիացիների լեզվամտածողությունում «80» թիվ չորս անգամ քսանն է: Քրիստոնեությունը «20» -ը մեկնաբանում է որպես «տասը պատվիրաններ» -ի իրացումը մարդու արարքներում: Մեկ այլ վարկածի համաձայն՝ «20» -ը «5 X 4» -ն է, որտեղ առաջին թիվը «Հնգամատյան» է նշանակում, իսկ երկրորդ թիվը՝ չորս ավետարանները: Այսպիսով՝ «20» թիվն արտահայտել է Աստվածաշնչի Հին և Նոր կտակարանների սինթեզը: «20» -ը նաև մեկնաբանվել է որպես մարմնական 5 զգացողությունների աշխարհից անցում չորս ավետարանների հոգևոր աշխարհ: |