Իլինոյս նահանգում արգելված է շների, կատուների կամ ընտանի այլ կենդանիների բերանը վառած սիգար դնելը: Այս նահանգի Չիկագո քաղաքում հիվանդներին, տգեղներին, հաշմանդամներին կամ արտաքուստ արգահատանք հարուցողներին արգելված է քաղաք դուրս գալ: Հիշյալ քաղաքում նաև արգելված է պիժամա հագած ձուկ որսալն ու թավշե արջուկով օպերայի շենք մտնելը: Չիկագոյում Անգլիայի անգլերենով խոսելն անօրինական արարք է համարվում: Գերնի քաղաքում 100 կիլոգրամից ավելի քաշ ունեցող կանանց արգելված է կարճ տաբատ հագած ձիավարել: Ժոլիետ քաղաքում արգելված է «Ժոլիետ» անունը բարձրաձայնել: Ինդիանա նահանգում կապիկներին արգելված է ծխախոտ ծխելը: Գերի քաղաքում արգելված է սխտոր ուտելուց հետո առնվազն չորս ժամ չանցած թատրոն գնալը; Սթափֆորդից եկած այրիներին թույլ չի տրվում մտնել մորմոնաբնակ Ուարսաու գյուղաքաղաք: Ինդիանայում անօրինական է համարվում մեկձեռնանի դաշնակահարի համերգն ունկնդրելու եկածից գումար պահանջելը: Իլինոյսի Ֆորտ Մեդիսոն քաղաքի հրշեջները, հրդեհը հանգցնելուն ձեռնամուխ լինելուց առաջ, պարտավոր են 15 րոպե լիցքային վարժություններ կատարել: Այովա նահանգի Օտումուա քաղաքում տղամարդուն արգելված է քաղաքի տարածքում աչքով անել ցանկացած կնոջ, որին ինքը չի ճանաչում: Կանզաս նահանգում ապօրինի է համարվում կիրակի օրերին կեռասով տորթի վաճառքը: Եթե կինը դաժան վերաբերմունք է դրսևորում սկեսրոջ, կամ ամուսինը՝ զոքանչի հանդեպ, Կանզաս նահանգի Ուիչիտա քաղաքում դա ապահարզանի հիմք չի համարվում: Այս նույն նահանգի Լանգ քաղաքում մարդկանց արգելված է օգոստոս ամսին ջորի հեծած գլխավոր փողոցով գնալ, եթե ջորու գլխին գլխարկ չկա: Իսկ Նատոմա քաղաքում արգելված է դանակ նետել զոլավոր մարզաշապիկ հագած մարդկանց վրա: Կենտուկի նահանգում ոչ մի էգ չի կարող լողազգեստով հայտնվել այս նահանգի ճանապարհներին. նրան պետք է առնվազն երկու ոստիկան ուղեկցի կամ նա պետք է զինված լինի դագանակով: Քանի որ «էգ» եզրույթը (անգլախոս երկրներում, ինչպես հայերենում, կնոջ սեռն այդ եզրույթով է հատկանշվում, մինչդեռ ռուսերենում, օրինակ ասվում է «женский пол») կարող էր շփոթմունք առաջացնել ու տարընթերցման հանգեցնել, հետագայում այս օրենքին հետևյալ հավելումն է կատարվել. «Այս պահանջը չի վերաբերում 90 ֆունտից (1 ֆունտը հավասար է մոտ 450 գրամի) պակաս քաշ և 200 ֆունտից ավելի քաշ ունեցող էգերին ու զամբիկներին»: Այս նահանգում նաև արգելված է նույն անձնավորության հետ 4 անգամ ամուսնանալը: (շարունակելի) |