Մայիսի 22-ին Նոր Նորքում ևս ազդարարվեցին վերջին զանգի ավարտական ղողանջները: Բոլոր ուսումնական հաստատություններում տոնական տրամադրություն էր՝ ներհյուսված հուզմունքի և ուրախության անթաքույց զգացումներով: Նոր Նորք վարչական շրջանի ղեկավար Արմեն Ուլիխանյանի նախաձեռնությամբ շրջանի բոլոր դպրոցներին շնորհավորական մաղթանքներ ուղղեցին, նվերներ և խորհրդանշական հուշանվերներ հանձնեցին վարչական շրջանի ղեկավարի աշխատակազմի ներկայացուցիչները: Հերթական տոնական հանդիսությունը Նոր Նորքի հ.159 ավագ դպրոցում էր, որտեղ անակնկալ այցով հյուրընկալվել էր նաև Նոր Նորք վարչական շրջանի ղեկավար Արմեն Ուլիխանյանը: Շրջանի ղեկավարը շնորհավորեց և բարի երթ մաղթեց բոլոր շրջանավարտներին՝ մեծ կյանքի ճանապարհին ցանկանալով բազում ձեռքբերումներ ու հաջողություններ: Արմեն Ուլիխանյանն ընթերցեց նաև Երևանի քաղաքապետ Տարոն Մարգարյանի շնորհավորական ուղերձը վերջին զանգի առթիվ՝ դպրոցին հանձնելով տոնական նվեր և խորհրդանշական հուշանվեր: Նոր Նորքի հ.159 ավագ դպրոցում կայացած Վերջին զանգի հանդիսությանը ներկա էր նաև ՀՀ ԵԿՄ փոխնախագահ Ղուկաս Ուլիխանյանը, ով շրջանավարտներին փոխանցեց ԵԿՄ ղեկավար, գեներալ–լեյտենանտ Մանվել Գրիգորյանի շնորհավորական ուղերձը: Շրջանավարտները գեղեցիկ միջոցառումներով հրաժեշտ տվեցին հարազատ դարձած կրթօջախներին, որոնց սերմանած պատգամներով ու դասերով վստահորեն կնվաճեն կյանքի և գիտության բարձունքները: Նկարները՝ այստեղ |