![](https://mamul.am/images/pics/170816/filip-zhakote-u72272-1.jpg)
Ողջ բանաստեղծական գործունեությունը կոչված է հաշտեցնելու կամ առնվազն մերձեցնելու սահմանափակն ու անսահմանը, լույսն ու մութը, շունչն ու ձևը: Ահա թե ինչու բանաստեղծությունը վերադարձնում է մեզ դեպի մեր կենտրոնը, մեր կենտրոնական մտահոգությունը, դեպի կյանքի ու մահվան մետաֆիզիկական հարցը… Հնարավոր է, որ գեղեցկությունը ծնվում է, երբ սահմանափակն ու անսահմանը տեսանելի են դառնում միաժամանակ, ասել է թե երբ մենք տեսնում ենք ձևերը` հայտնագործելով, որ նրանք ամբողջը չեն ասում, որ նրանք չեն նվազել ինքնին, և որ նրանք անըմբռնելիին են թողնում մի մասը:
Անգետը ժողովածուից Այգաբացին I Գիշերն այն չէ, ինչ թվում է. կրակի վախճան, օրվա կործանում և ժխտումը լույսի, փախուստը սակայն բացել է տալիս մեր աչքերն առ այն, ինչն անհայտ է մնում, որքան էլ լուսավորես: Հավատարիմ սպասավորներ տեսանելի հեռացածների, խավարի սաղարթի ներքո կացարանն է գցված մանուշակի, վերջին ապաստանը նրա, ով ծերանում է անհայրենիք… II Ինչպես նավթավառի մեջ քնած յուղն է շուտով ամբողջովին վերափոխվում լույսի ու շնչում է լուսնի ներքո` տարված թռչունների ճախրով, դու մրմնջում ես ու այրվում (Բայց ինչպե՞ս ասել այդ բանը, որ չափազանց մաքուր է ձայնի համար) Դու ծնվող կրակ ես ցուրտ գետերի վրա, արտույտ ես դաշտում ժայթքող… Ես տեսնում եմ քո մեջ բացվող ու համառորեն ընդդիմացող գեղեցկությունը երկրի: III Ես խոսում եմ քեզ հետ, իմ բացվող այգ: Բայց այս ամենն արդյոք նույնական չէ՞ օդում ճախրող բառերին: Քոչվորը լույսն է: Նա, ում համբուրում ենք, համբուրվածն է դառնում ու չքվում է: Մի վերջին անգամ իրեն ողբակցող ձայնի մեջ համբառնում է նա ու ճառագում, այգը: Անգետը Որքան ավելի եմ ծերանում, այնքան ավելի եմ սերտաճում անգիտությանը, որքան ավելի եմ ապրում, այնքան ավելի քիչ ունեմ և ավելի քչին եմ տիրապետում: Ողջն ինչ ունեմ, մի տարածք է հետզհետե ձյունծածկ կամ պսպղուն, բայց ոչ երբեք բնակեցված: Որտե՞ղ է տվիչը, ուղեկցորդը, խնամակալը: Սեղմված իմ սենյակում` սսկվել եմ ես (լռությունը մտնում է ծառայի նման` սենյակը մի քիչ կարգի բերելու) և ես սպասում եմ, որ ստերը կցրվեն մեկ առ մեկ. ի՞նչ է մնում ինձ, ի՞նչն է խանգարում ինձ` մահացողիս, որ մահանամ: Ի՞նչ ուժ է դեռ խոսեցնում նրան իր չորս պատերի մեջ: Կզորե՞մ ես դա իմանալ, ես` անգետս խռովյալ: Սակայն ես իրոք լսում եմ նրան, նա, ով խոսում է, և խոսքը նրա իմ մեջ է թափանցում օրվա հետ, դեռևս շատ մշուշոտ. «Ինչպես կրակը, այդպես էլ սերը կորուստներով է իր լոկ լուսավառվում և գեղեցկությամբ մոխրափոշու…»
Տարածություններ Արմեն Լյուբենին (Շահան Շահնուրին) Սև չղջիկներն են պտույտներ գործում բարձրում օդեղեն. Ավելի բարձրում աստղերն են ճախրում անտեսանելի: Երբ օրն է ծածկվում ծայրեզերքում երկրի, կրակներն են հայտնվում լայնություններում խավար ավազին… Այսպես ապրում ենք մենք ոլորտում շարժումերի ու տարածությունների: Այսպես էլ սիրտն է ճախրում ծառից թռչունը դեպի, թռչունից դեպի աստղերն հեռավոր, աստղից դեպի իր սերը: Այսպես սերն է աճում տնակում ներփակ, ճախրում է ու բանում սպասավորը բազմազբաղ` մի ձեռքում ճրագը բռնած:
Եղանակներ ժողովածուից
Ձմռան վերջ Շատ քիչ բան կա, որսալու` ոչինչ, տարածությունը կորցնելու վախը թողնված է հոգուն թափառական Բայց գուցե, ավելի թեթև, իր տևումից շատ ավելի անորոշ է նա՛, ով երգում է ձայնով մաքրամաքուր հեռաստանները երկրի… Արցունքների ցանքս փոփոխական դեմքին, հուրհրատող եղանակ խոխոջացող գետերի. վիշտ` երկիրը հորատող Տարիքը զննում է ձյունը լեռներում հալչող Ստվերներն այս` ձմռան խոտերում վերապրող, նվազ ծանր քան խոտը, վախվորած ծառեր համբերատար, գաղտնածածուկ, հավատարիմ, և դեռևս անզգայելի մահը Մշտապես օրվա մեջ թափառող` քամու թռիչքն այս մեր մարմինների շուրջ Մշտապես օրվա դաշտերում` գերեզմաններն այս թերթաքարե կապույտ Ճշմարտություն, ոչ ճշմարտություն տարրալուծվում են ծխագոլորշում Աշխարհի բարիքները կանցնեն ինչպես որ գեղեցկությունն է սիրելի մտնում քո մեջ` տոնելու մոխրափոշին կրակված Ճշմարտություն, ոչ ճշմարտություն հուրհրատում են, ցնծա՛ մոխիր զգլխիչ… Լուսին ամռան այգաբացին Օդում ավելի ու ավելի պարզկա առկայծում է դեռ արցունքն այս կամ մարմրող կրակը ապակեփայլ, մինչ լեռների նիրհից ոսկե գոլորշի է բարձրանում Մնա՛ այսպես առկախված կշիռքներից արշալույսի` ածխակրակի մեջ խոստումնալից և այս կորուսյալ մարգարտացողի միջև Թռչուններ, ծաղիկներ և մրգեր Ծղոտ բարձրուղեշ այգաբացում այս թեթև շունչը հողահարթակին. արդ ի՞նչն է անցնում մի մարմնից մյուսը: Աղբյուր փախ տված օրրանից լեռների, մրո՞ւր: Ձայները թռչունների լսելի չեն քարերի մեջ այս, միայն շատ հեռվում մուրճեր Ամեն ծաղիկ գիշեր է լոկ ձևացնելով, թե մոտեցել է այն արդեն Բայց այնտեղ, ուր նրա բույրն է վեր հառնում, ես չեմ կարող, հույս չկա, թե կմտնեմ ուստի նա ինձ տանջահար է անում շատ և սպասեցնում այնքան երկար դռան առաջ այդ մշտափակ Ամենայն գույն, ամենայն կյանք ծնվում է այնտեղ, ուր հայացքն է գամվում-մնում Այս աշխարհը այլ բան չէ, քան ցցակատար հրդեհումի աներևույթ: Ես քայլում եմ պարտեզում թարմ ածուխների նրանց թաքստոցի ներքո սաղարթախիտ վառվող ածուխը բերանիս Այն, ինչն այրում է` պատառոտելով օդը վարդագույն կամ բաժանումով հանկարծահաս կամ հեռացումով մշտնջենական Ուռճացնելով գիշերը Լեռն է իր զույգ լանջերին փռված սնուցանում զույգ աղբյուրները արցունքների Գիշերվա ամենավերջում, բարձրանալուն պես այս քամու մոմը նախ մարմրաց Առաջին թռչուններից կանուխ այդ ո՞վ կարող է արթնացած լինել: Քամին դա գիտի, նա, որ գետերն է կտրում-անցնում, Բոցն այս կամ արցունքը շրջված դեպի վեր. մի քանի գրոշ` լաստավարին ի վարձ մի վարդագույն ցցված մազափունջ հորիզոնում, տեղախախտված կրակ և հոպոպը կաղնուտում` իր անունը թակող Կրակներ անհագ, ձայներ ծպտյալ, վազք ու հառաչանք Աչք: Աղբյուր լիառատ Բայց որտեղի՞ց է այն բխում: Ավելի հեռվից, քան հեռաստանն է ավելի խորքից, քան խորաստանը Կարծում եմ ես այլ աշխարհից եմ խմել Ի՞նչ է հայացքը. խայթոց` ավելի սուրուլիկ, քան երկարուկ, անկշտում վազք` մի ծայրահեղությունից դեպի հաջորդը, խորխորատներից` հեռաստանները, խավարամածից` մաքրամաքուրը, գիշատչաթռչուն Ա՜խ… հովվերգություն մեկ անգամ ևս, որ սկիզբ է առնում խորքից մարգագետինների` հովիվների հետ իր պարզմիտ ոչ այլ ինչի համար, բայց լոկ բաժակի քրտնաթորած, որից անկարող է բերանը խմել, ոչ այլ ինչի համար, բայց լոկ ողկույզի թարմաշունչ, որ հուրհրատում է շատ ավելի բարձր, քան Վեներան… Ես այլևս չեմ ցանկանում ինձ ճախրանքին տալ արագությամբ ժամանակի հավատալով ընդսմին մի պահ միայն անշարժությանն իմ սպասումի Ֆրանսերենից թարգմանությունը` Աշոտ Ալեքսանյանի Անդին 4, 2017 |