Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց Փարիզի «Դպրոցասեր» վարժարանի աշակերտներին: Ապրիլի 22-ին Փարիզի «Դպրոցասեր» վարժարանի աշակերտներն` ուղեկցությամբ Մայր Աթոռի բարերար Սարգիս Պետոյանի, համայն հայության հոգևոր կենտրոն էին այցելել` ստանալու Նորին Սրբության օրհնությունը և հայրական պատգամները: Հանդիպման սկզբում տիար Ս. Պետոյանն Ամենայն Հայոց Կաթողիկոսին ներկայացրեց «Դպրոցասեր» վարժարանի աշակերտներին: Ամենայն Հայոց Հայրապետն իր խոսքում նշեց, որ աշակերտների այցելությունը Հայաստան և Մայր Աթոռ Ս. Էջմիածին պիտի ոգեշնչի ու խանդավառի նրանց` նախանձախնդրորեն և ջանասիրաբար գիտելիքներ ամբարելու, զորանալու հավատամության մեջ հանդեպ ազգային-հոգևոր սրբություններն ու արժեքները: Զրույցի ընթացքում Վեհափառ Հայրապետը նաև իր գնահատանքը հայտնեց տիար Սարգիս Պետոյանին և դպրոցի տնօրինությանն ու մանկավարժներին, որոնց նվիրյալ ջանքերով հայրենիքից հեռու գտնվող հայորդիները հայեցի կրթություն են ստանում` ճանաչելով իրենց ազգային ինքնությունը: |