Դու ուխտ ես արել, իմ հա՛յ ժողովուրդ,
Եվ ճամփադ աներե՛ր պիտի անցնես,
Արդեն մեկ դար է, որ նախնիներիդ
Սուրբ շիրիմները սպասում են քեզ:
Արդեն մեկ դար է սեգ Արարատի
Հայացքը մթնել, նախատում է մեզ,
Դարավոր քնից արթնացի՛ր, ազգ՝ իմ,
Բա՜վ է, էլ բա՜վ է, բավ է համբերես:
Դու, որ քրտինքդ՝ կաթի՜լ առ կաթիլ,
Հազարամյակներ խառնել ես հողին,
Կռիվ ես տվել ժեռ քարերի հետ,
Որ արտ ու այգի ծաղկեն ու պտղեն,
Ստեղծել ես քո անկյունը՝ խաղաղ,
Որ գեղեցիկը արարես միայն,
Քո բազուկներով է շենշող դարձել
Պապերիդ երկիրը՝ Արարչական:
Դու, որ ժայռերից վանքեր ես կերտել
Եվ Աստվածամայր՝ մանուկը գրկին,
Որ՝ հանուն սիրո ու խաղաղության,
Սուրբ խաչ ես պարզել համայն աշխարհին,
Ո՛չ, երկմտելու իրավունք չունե՛ս,
Դու ուխտիդ ճամփան պիտ շարունակե՛ս,
Եվ նախնիներիդ ոգեղեն կանչով
Սրբազան հողիդ տե՛ր պիտի կանգնես: