Դրախտավայր իմ քարակերտ,
Հոգու տաճար, պայծառ գալիք,
Ի՛մ Հայաստան, բերդ դարակերտ,
Աստվածավանք, սուրբ հայրենիք:

Լեռնաշխարհիս հրե գագաթ,
Արևահամ ծիրանատուն,
Նարեկաշուրթ հին մագաղաթ,
Հա՜ր-հարավո՜ր իմ վեհություն:

Պանդուխտներիդ սրտի բաբախ,
Արարչագործ տիեզերքի,
Որթան կարմիր, սիրո շաղախ,
Ամեն քարդ, շար է վանքի:

Զավակներիդ հրե սանդուխք,
Դու՛, սրբավանք մկրտումի,
Արևաշուք հոգու մասունք,
Երկրականչն ես խիզախումի:

Քաջ նժդեհի հավերժատուն,
Հզոր պատվար արդարության,
Հերոսներիդ սուրբ օրհնատուն,
Հազարդարյա իմ Հայաստան…