Հուլիսի 4-ին ժամը 18.00-ին, «Սուրբ Գրիգոր Լուսավորչի նշխարների գյուտի» տոնին ընդառաջ Երևանի Սբ. Գրիգոր Լուսավորիչ Մայր եկեղեցու համայնքի և եկեղեցու «Հավատամք» հոգևոր կենտրոնի անդամները, առաջնորդությամբ կենտրոնի Հոգևոր Հովիվ Տեր Հակոբ քահանա Խաչատրյանի և եկեղեցու Լուսարարապետ Տեր Դավիթ քահանա Շախկյանի, Խոր Վիրապից Երևանի Սբ. Գրիգոր Լուսավորիչ Մայր եկեղեցի կբերեն Խոր Վիրապում վառված կանթեղը:
Ժամը 19.00-ին, Սբ. Գրիգոր Լուսավորիչ Մայր եկեղեցու գլխավոր մուտքի աստիճանների առջև, (Զորավար Անդրանիկի արձանի հարևանությամբ) թափորին կդիմավորի հավատացյալ ժողովուրդը և միասին կշարժվեն Մայր եկեղեցի:
Կանթեղի լույսով կվառվեն Սբ. Գրիգոր Լուսավորչի մասունքների ամպհովանու գլխավոր կանթեղը և խորանի մոմերը: Այնուհետև Մայր եկեղեցու հոգևոր տեսուչ Տեր Անուշավան եպիսկոպոս Ժամկոչյանի հանդիսապետությամբ կկատարվի նախատոնակ և մասնակիցների «Օրհնության կարգ»:
Ժամը 20. 00-ին եկեղեցու հարակից տարածքում «Հավատամք» հոգևոր կենտրոնի «Հավատամք» երգչախմբի և պարախմբի, ինչպես նաև «Վան» երգի և պարի ազգագրական համույթի մասնակցությամբ տեղի կունենա տոնական համերգ:

Հավատացյալները հնարավորություն կունենան Խոր Վիրապից բերված կանթեղից ճրագներ վառել և տանել տուն:

Այս տոնը Գրիգոր անունը կրող և Գրիգորյան ազգանունը կրող անձանց անվանակոչության տոնն է:

«ՀԱՎԱՏԱՄՔ» հոգևոր կենտրոնի մամլո գրասենյակ