Եղեռնի 100-ամյա տարելիցի կապակցությամբ կազմակերպվող միջոցառումների կարևոր խորհուրդ-խորհրդանիշ դարձած անմոռուկները իրենց արարման հրաշքին արժանացան հայ աշակերտների հմուտ ձեռքերի շնորհիվ: Անցկացված միջոցառման արդյունքում Հայաստանի բոլոր դպրոցների աշակերտների ձեռքերով պատրաստված անմոռուկները ապրիլի 10-ին տեղադրվեցին փոքրիկ արկղիկներում և ուղարկվեցին հատուկ նշանակության վայրեր` որպես խորհուրդ-խորհրդանիշներ այն հարյուրամյա հիշողության, որը դարձել է ցանկացած հայի գիտակցություն: Իսկ այդ օրը` ապրիլի 10-ին, Աբովյանի թիվ 6 ավագ դպրոցի մի գողտրիկ անկյունում խնամքով դասդասվում էին քնքուշ անմոռուկները մեր աշակերտների ձեռքերով: Ակտիվ մասնակցություն էին ցուցաբերել բոլոր դասարանները: Այդ մանուշակագույն հեքիաթի արարումը, որ ունի հավերժի խորհուրդ, մերթընդմերթ ընդհատվում էր տնօրենի` ընկեր Վարդանյանի խորհուրդ-խրատներով, խրատ-զրույցով, որը ոչ թե հառաչանք էր կամ ցավի ահագնացում, այլ ճիշտ ճանապարհով, արդարության աղաղակով ու կոչերով ընթացող երթի մեկնարկ. «Պահպանել է պետք այն, ինչ ունենք, այն, ինչի կհասնենք ու ձեռք կբերենք, պահպանելու համար պետք է հիշել, հիշողությունը հստակեցնում է ճիշտ ապրելու ձևը»: Կարծում ենք` երեխաների ձեռքերով պատրաստված անմոռուկները ամենասառնասիրտ հյուրին անգամ կվկայեն, որ հիշողությունը անջնջելի է, որ պահանջը հայ երեխայի շուրթերին է, որ ապագան ուշ թե շուտ կփռի իր արդարածիր թևերը աշխարհի բոլոր կողմերում: Աշակերտական խորհուրդ |