Արտենիի թիվ 1 միջնակարգ դպրոցում նշվում էր Սուրբ Զատիկը: Ուսհաստատությունում կարևորվում են քրիստոնեական ու ազգային բոլոր տոներն ու ծեսերը: 1-8-րդ դասարանների բոլոր աշակերտները նախապատրաստվել էին տոնին: Կարևոր էր, որ աշակերտները տոնն ընկալել էին որպես հարության ու նոր կյանքի սկզբնավորման խորհրդանիշ: Իբրև սկիզբ հնչեց Մակար Եկմալյանի «Սուրբ սուրբը» ՝ Լուսինե Զաքարյանի կատարմամբ: Ապա հնչեց «Առավոտ լուսո» ՝շարականը: Միմյանց հաջորդելով աշակերտները ներկայացրին զատիկի խորհուրդը, ձու ներկելու սովորույթը, նշվեց որ ձուն խորհրդանշում է մեր հարության հույսը և հարության տոնին ձուն ներկում ենք կարմիր ՝ Տիրոջն ասելով . «Տեր քո հարության զորությամբ հավաքիր մեզ իբրև ձագուկների քո ամենաընդգրկուն թևերի տակ»: Աշակերտները նախապես ձևավորել էին և իրար նվիրեցին զատկական բացիկներ ու բարեմաղթանքներ: Դպրոցի կրթության և դաստիարակության գործի պատասխանատուները վստահ են, որ կիրակի ՝ Սուրբ Զատկի տոնին, հոգեպես պատրաստ էր իրենց կրթօջախի աշակերտը: Նա ընկալել էր զատկի խորհուրդը, գիտակցում էր, որ Քրիստոսն է այն հավիտենական զոհը կամ պատարագը, որի միջոցով մարդն ստանում է մեղքերի թողություն, ապա կյանք և հարություն: Քրիստոսի հարությունը քրիստոնեական վարդապետության ու հավատի հիմքն է:

Քրիստոս հարյավ ի մեռելոց, օրհնյալ է հարությունը Քրիստոսի: