«Երաժշտությունը միավորում է հոգևոր ու մարմնավոր ուժը, այն համախմբում է մարդկանց, բայց և պահանջում լինել անհատական: Բառերով դժվար է երաժշտության էությունը բացատրել: Պայքարում եմ, որպեսզի դպրոցներում երաժշտություն անցնեն ինչպես մյուս առարկաները, քանի որ այն զարգացնում է մարդու մտավոր կարողությունները: Երաժշտությունը հոգևոր դրսևորման գագաթնակետն է», -ասում է տաղանդավոր երաժիշտ, Բեռլինի պետական նվագախմբի ցմահ դիրիժոր, յոթ «Գրեմիի» մրցանակակիր Դանիել Բարենբոյմը:

Մայիսի 13-ին մեկ բացառիկ համերգով 450 տարիների փորձ ունեցող նվագախումբն առաջին անգամ հանդես եկավ Երևանի «Արամ Խաչատրյան» համերգասրահում: Համերգային ծրագրում հնչեցին Ֆրանց Շուբերտի N 8 «Անավարտ» սի բեմոլ մինոր և Լյուդվիգ վան Բեթհովենի N 7 լյա մաժոր սիմֆոնիաները, որոնք հայ հանդիսատեսն ընդունեց բուռն ոգևորությամբ: «Երևանյան հեռանկարներ» միջազգային երաժշտական փառատոնի 15-ամյակի առիթով` տաղանդավոր իսրայելցի երաժիշտն արժանացավ «Ոսկե մեդալի»: