Այսօր ՀՀ նախագահի թեկնածու Րաֆֆի Հովհաննիսյանի նախընտրական շտաբի խոսնակ Հովսեփ Խուրշուդյանը եւ երիտասարդ կամավորական Անի Հայրապետյանը Քաղաքացիական ազգային նախաձեռնություն ՀԿ դահլիճում ներկայացրին Րաֆֆի Հովհաննիսյանի http://www.raffi4president.am պաշտոնական կայքը եւhttps://www.facebook.com/Raffi.K.Hovannisian ֆեյսբուքյան էջը:

Նշվեց, որ Րաֆֆի Հովհաննիսյանը մշտապես կարեւորել է Համացանցը, որի հնարավորությունները լայնորեն կիրառվել են «Ժառանգություն» կուսակցության քարոզարշավի ընթացքում, իսկ այժմ դրանք կիրառվելու են նախագահական ընտրարշավում:

Կայքում տեղադրված են Րաֆֆի Հովհաննիսյանի կենսագրությունը եւ նախընտրական ծրագիրը, օրական մի քանի անգամ թարմացվում են լուրերի ու տեսահոլովակների բաժինները: Կայքից ուղիղ հղում կա «Ժառանգության» YouTube-ի տիրույթ եւ Րաֆֆի Հովհաննիսյանի ֆեյսբուքյան պաշտոնական էջ:

Ֆեյսբուքի դեպքում իրականացվում է նաեւ վճարովի գովազդների տեղադրում, իսկ Րաֆֆի Հովհաննիսյանի կողմնակիցներն ակտիվորեն տարածում են նրա էջում զետեղվող նյութերն ու լուսանկարները: Այդ ամենի շնորհիվ ընդամենը 2 օր գործող ՖԲ էջն արդեն ունեցել է հարյուր հազարավոր դիտումներ եւ այցելուներ:

Որպես նորույթ՝ նշվեց QR-կոդի կիրառումը նախընտրական պաստառների վրա, որոնք փակցվելու են ամբողջ հանրապետությունով մեկ: Նոր սերնդի բջջային հեռախոսները հնարավորություն ունեն սկանավորելով այս QR-կոդը՝ անմիջապես մուտք գործել Րաֆֆի Հովհաննիսյանի կայք: