«Նիդերլանդական օրագիր» -ը Էլեկտրոնային լրատվամիջոցների մեջ լավագույններից է «Նիդերլանդական օրագիր» լրատվամիջոցը «Էլեկտրոնային լրատվամիջոց» լավագույն հրապարակում անվանակարգում արժանացել է մրցանակի և առաջին կարգի դիպլոմի: Ապրիլի 9-ին. կայացավ ՀՀ սփյուռքի նախարարության, Համաշխարհային հայկական կոնգրեսի և Ռուսաստանի հայերի միության հետ համատեղ կազմակերպված «Հայապահպանության գործում նշանակալի ավանդի համար» ամենամյա մրցանակաբաշխության 2014թ. արդյունքների ամփոփման հանդիսավոր արարողությունը: Մրցանակաբաշխությունը կազմակերպվեց Հայոց ցեղասպանության 100-րդ տարելիցի միջոցառումների շրջանակներում՝ «Հիշում եմ և պահանջում» խորագրի ներքո: Ողջունելով ներկաներին՝ ՀՀ Սփյուռքի նախարար տիկին Հրանուշ Հակոբյանը նշեց. «Արդեն 6-րդ տարին է, ինչ իրականացվում է «Հայապահպանության գործում նշանակալի ավանդի համար» ամենամյա մրցանակաբաշխությունը, որի նպատակը մեկն է՝ արժևորել Սփյուռքում հայ ազգային ինքնության, մշակույթի պահպանման գործում կազմակերպությունների, անհատների ունեցած ներդրումը, արժևորել և գնահատել հայ համայնքների, կրթամշակութային կառույցների և լրատվամիջոցների գործունեությունը»: «Հայապահպանության գործում նշանակալի ավանդի համար» 2014 թվականի մրցանակաբաշխության «Հայոց ցեղասպանության 100-րդ տարելիցին ընդառաջ` լավագույն հրապարակում» անվանակարգում մրցութային հանձնաժողովի որոշմամբ ի թիվս այլ լրատվամիջոցների «Նիդերլանդական օրագիր» -ը «Էլեկտրոնային լրատվամիջոց» լավագույն հրապարակում անվանակրգում արժանացել է մրցանակի և առաջին կարգի դիպլոմի: Շնորհակալություն ենք ցանկանում հայտնել Սփյուռքի նախարարությանը՝ մեր գործունեությունը գնահատելու համար: Սա նաև Նիդերլանդներում աշխատող հայկական կառույցների աշխատանքի գնահատումն է, որի աշխատանքներն է լուսաբանում մեր օրագիրը, այն լրացուցիչ խթան կհանդիսանա՝ էլ ավելի արդյունավետ շարունակելու մեր համատեղ աշխատանքը: Մեր բոլոր ընթերցողներին այս կապակցությամբ շնորհավորում ենք: Ելենա Հարությունյան (մեր թղթ.) Երևան |