ԱՄՆ նախկին նախագահ Բարաք Օբաման 8.1 միլիոն դոլար արժողությամբ առանձնատուն է ձեռք բերել Վաշինգթոնում, հաղորդում է The Washington Post-ը: Առանձնատունը տեղակայված է մայրաքաղաքի հյուսիս արևմուտքում` Քալորամա շրջանում:
Օբամայի տան հարևանությամբ է գտնվում ԱՄՆ նախագահ Դոնալդ Թրամփի դստեր` Իվանկա Թրամփի առանձնատունը:
Ավելի վաղ` Սպիտակ տունը լքելուց հետո Օբամաները վարձակալել էին այդ առանձնատունը: Նրանք Վաշինգթոնում կմնան ևս 2.5 տարի, մինչև նրանց կրտսեր դուստրը չավարտի ուսումը:
Հայտնի է, որ նախկինում այդ տունը պատկանել է ԱՄՆ նախկին նախագահ Բիլ Քլինթոնի մամուլի քարտուղար Ջո Լոքհարթին: Տունն ունի 8 ննջասենյակ և 9 լոգասենյակ: Այն Քալորամա շրջանի երկրորդ ամենաթանկարժեք առանձնատունն է: Զիջում է միայն Amazon-ի հիմնադիր ու Washington Post-ի սեփականատեր Ջեֆֆ Բեզոսի առանձնատանը, որ գնահատվում է 23 միլիոն դոլար: