ԱՄՆ Քալիֆորնիա նահանգի Մոհավե անապատում անգարից առաջին անգամ դուրս են հանել աշխարհի խոշորագույն տրանսպորտային ինքնաթիռը, այն նախատեսված է նաև կրող հրթիռներ արձակելու համար։ Այս մասին հայտնում է Stratolaunch ընկերությունը, որը զբաղվում է ինքնաթիռի նախագծով:

Ինքնաթիռի թևերի բացվածքը կազմում է 117 մետր, քաշը՝ 230 տոննա, իսկ բարձրությունը՝ 15 մետր: Այն հագեցած է 28 անիվներով շասսիով, ընդ որում` փոխադրամիջոցի տեխնիկական բնութագրերը թույլ են տալիս տեղափոխել մինչև 250 տոննա բեռ:

Stratolaunch ինքնաթիռը մտադիր են օգտագործել որպես օդային հարթակ Pegasus XL կրող հրթիռների արձակման համար: Դրանք բեռներ կհասցնեն Երկրի ցածր ուղեծիր: Առաջին փուլում ինքնաթիռը կկրի մեկ հրթիռ, սակայն ենթադրվում է, որ դրանց թիվը կհասնի երեքի:

Ընկերության գլխավոր կառավարիչ Ջին Ֆլոյդի խոսքով՝ մոտ ժամանակներս Մոհավեում կանցկացվեն ինքնաթիռի վերգետնյա փորձարկումներ, իսկ առաջին ցուցադրական արձակումը պլանավորվում է իրականացնել 2019 թվականին: