Հյուսիսային Կորեան չի կարող տարեկան ավելի քան 2 միլիոն բարել նավթամթերք գնել, իսկ հյուսիսկորեական դրոշի տակ տեղափոխվող բեռները կարող են սառեցվել, եթե նավի հրամանատարությունը հրաժարվի բաց ծովում ստուգում իրականացնելուց: Այդպիսին են Հյուսիսային Կորեայի դեմ պատժամիջոցների խստացման պայմանները: Պատժամիջոցների խստացումը միաձայն ընդունվել է ՄԱԿ-ի Անվտանգության խորհրդի կողմից, հայտնում է Bloomberg-ը: Բացի այդ, բանաձևը նոր արգելք է սահմանում Հյուսիսային Կորեայում հեղուկացված բնական գազի համար: ԱՄՆ-ի էներգետիկայի նախարարության տվյալներով՝ մինչ այժմ Հյուսիսային Կորեան տարեկան մոտ 4 միլիոն բարելի չափով նավթ է ներկրել: Արտահանման մեծ մասն ապահովել է Չինաստանը:
Associated Press-ի հաղորդմամբ՝ ՄԱԿ-ի ԱԽ-ի կողմից սահմանված պատժամիջոցները կարող են երկրում 10-ից մինչև 50% կրճատել էներգակիրների հոսքը: