WhatsApp հայտնի մեսենջերի ղեկավար Յան Կումը լքել է պաշտոնը: ԶԼՄ-ներն այդ որոշումը կապում են Յան Կումի և Facebook սոցցանցի ղեկավարության միջև տարաձայնությունների հետ, այդ թվում՝ անվտանգության հարցերով: «Առաջ շարժվելու ժամանակն է եկել: Ես լքում եմ այն պահին, երբ մարդիկ WhatsApp-ի օգնությամբ կարող են անել ավելին, քան ես կարող էի պատկերացնել»,- գրել է Կումը Facebook-ի իր էջում: Washington Post պարբերականը պնդում է, որ Կումը նման որոշում է կայացրել Facebook-ի ղեկավարության հետ ծագած տարաձայնությունների պատճառով՝ հաղորդագրություններ ուղարկելու ծառայության անվտանգության և անձնական տվյալների օգտագործման վերաբերյալ: Պարբերականը նշում է, որ Կումն ու իր գործընկեր Բրայան Էքթոնը 2014թ. Facebook-ին վաճառելով մեսենջերը, խոստացել էին պահպանել դրա անկախությունն ու օգտատերերի պաշտպանության սկզբունքները: |