Կամերային երաժշտության ազգային կենտրոնից տեղեկանում ենք, որ Հայաստանի պետական կամերային նվագախումբը նոյեմբերի 11-ին, ժամը 19:00 հանդես կգա ջութակահար, դիրիժոր Զարեհ Սահակյանցի 85-ամյակին նվիրված համերգով: Համերգը տեղի կունենա Կոմիտասի անվան կամերային երաժշտությանը տանը: Երեկոյի ընթացքում որպես դիրիժոր հանդես կգա Հարություն Արզումանյանը: Նվագախմբի հետ ելույթ կունենան Նիկոլայ Մադոյանը (ջութակ), Խուան Պարդոն (ալտ տրոմբոն/Իսպանիա), Նարեկ Կազազյանը (քանոն), Մարի Լալայանցը (ֆլեյտա), Լիա Հարությունյանը (ֆլեյտա), Մաքսիմ Նովիկովը (ալտ/Ռուսաստան): Կհնչեն Գեորգ Վագենզեյլի, Ծովինար Հովհաննիսյանի, Երվանդ Երկանյանի, Էդվարդ Միրզոյանի, Մաքս Ռեգերի ստեղծագործությունները: Նշենք, որ հայ ու համաշխարհային դասական ու հոգևոր երաժշտության հանրայնացման ու ներկայանալի դարձնելու կարևորությունն ու նախանձախնդրությունն էր այն կարևոր շարժառիթը, որհետպատերազմյան Հայաստանում 1962թ. ստեղծվեց Կամերային նվագախումբը: Զարեհ Սահակյանցը շնորհիվ իր վառ անհատականության և հեղինակության կարողացավ իր շուրջը համախմբել մի խումբ նվիրյալ երաժիշտների, և կարճ ժամանակում նվագախումբը ձեռք բերեց մեծհամբավ Հայաստանում և նրա սահմաններից դուրս: Սահակյանցի անձի և անվան հետ են կապված նվագախմբի բարձրաճաշակ գեղարվեստական ոճի ձևավորումը, երգացանկային հստակ դիրքորոշումը, ունկնդրի խանդավառ ընդունելությունը Հայաստանում, ԽՍՀՄ հանրապետություններում և արտերկրի համերգասրահներում: Նրա թողած կատարողական, ստեղծագործական հարուստ ավանդույթները ժառանգեցին ու շենացրին նվագախմբի հետագա գեղարվեստական ղեկավարները՝ Կոստանդին Բաղդասարյանը` 1975-ից, ՌուբենԱհարոնյանը` 1982-ից, Արամ Ղարաբեկյանը՝ 1997-ից: 2011-ին նվագախմբի գեղարվեստական ղեկավար և գլխավոր դիրիժոր նշանակվեց Վահան Մարտիրոսյանը: |