«Նարեկացի» արվեստի միության ֆեյսբուքյան էջում գրված է. ««Նարեկացի» արվեստի միությունում տեղի ունեցավ Մհեր Ղազարյանի լուսանկարների ցուցահանդեսը: Ցուցահանդեսին ներկայացվեցին ինչպես Մհեր Ղազարյանի աշխատանքները, այնպես էլ ընթերցվեցին նրա ստեղծագործությունները: «Այսօր մեր հարկի տակ շա՜տ լուսավոր ցուցահանդեսի բացում է. ձեզ ենք ներկայացնում երիտասարդ լուսանկարիչ Մհեր Ղազարյանի աշխատանքները: Մհերի բնության հետ կապն ու սերը դեպի բնությունը արտացոլված են նրա լուսանկարներում: Այս աշխատանքները նրա էությունը ներկայացնելու մի փոքրիկ մասն է. ցավոք, Մհեր Ղազարյանն այսօր մեզ հետ չէ, սակայն մեզ է թողել ահռելի աշխատանքներ իր ստեղծագործական կյանքից»,- նշեց «Նարեկացի» արվեստի միության ցուցահանդեսների պատասխանատու Լիլիթ Վարդումյանը: Ցուցահանդեսին խոսքով հանդես եկավ նաև «Նարեկացի» արվեստի միության գեղարվեստական խորհրդատու Դանիել Երաժիշտը: «Կարծես ես ճանաչել եմ Մհերին. նրան չեմ տեսել, սակայն նրա արվեստի միջոցով ինձ թվում է, որ մենք ընկերներ ենք եղել, քանի որ ընդհանուր բան ունենք՝ հայրենասիրությունը: Այս նկարների միջոցով կարելի է թափանցել նրա ներաշխարհն ու ասել, թե ուր էր նայում նրա աչքը: Այսօր խոսքն անմահության մասին է , ոչ թե մահվան...»»: