Թբիլիսիի քաղաքապետարանի մոտ տաքսու վարորդները ցույց են անցկացնում՝ պահանջելով հետաձգել տեխզննման մասին նոր կանոնակարգի կիրառումը։ Տաքսիստները պահանջում են նաև քաղաքապետ Կախա Կալաձեի հետ հանդիպում, այս մասին հայտնում է Վրաստանի հայալեզու «Ալիք Մեդիա» կայքը: Տաքսիստներից ոմանք ասում են, որ տարեկան երկու անգամ պարտադիր տեխզննում անցնելը, ինչպես նաև աջ ղեկով և երկդռնանի մեքենաների համար նախատեսված սահմանափակումները պետք է վերանայվեն: Հիշեցնենք, որ ըստ նոր կանոնակարգերի, Վրաստանում շահագործվող տաքսիները ստիպված կլինեն տեխզննում անցնել տարվա ընթացքում երկու անգամ: Տաքսիները պարբերաբար տեխզննում կանցնեն մեքենայի արտադրման տարեթվից մեկ տարի անց, այնուհետև յուրաքանչյուր հաջորդ տեխզննումը տեղի կունենա 6 ամիսը մեկ անգամ: |