Վերլուծող Սարգիս Միքայելյանը ֆեյսբուքյան իր էջում գրել է. «Սիրելի բարեկամներ, ես երբեք առանձնապես չեմ համակրել Սանասարյան Դավիթին՝ որպես քաղգործիչ, հաճախ տարբեր բաներ իր հրապարակային գործունեությունում ինձ անտանելի են թվացել...: Բայց դա կապ չունի, և ես միշտ համարել եմ, որ նա ազնիվ մարդ է: Ես հիմա էլ եմ համարում, որ նա ազնիվ մարդ է և անկեղծորեն նվիրված իդեաներին և իդեալներին: Եվ հիմա շատ դժվար կլինի ինձ համոզել, որ նա ինչ-որ կոռուպցիոն բանում խառն է: Մի տեսակ «չի կպնում» իմ ընկալմամբ՝ Դավիթը՝ կոռուպցիոներ և կամ չարաշահող...

Բայց ավելի դժվարությամբ եմ պատկերացնում, որ այսօր ԱԱԾ-ն կբռներ ու հենց այնպես, հավեսի համար կամ չգիտես՝ ինչ «սարքելու» համար մեղադրանք կառաջադրեր Դավիթին: Մի մարդու, որ պետական կարևորագույն ծառայություններից մեկի ղեկավարն է, որը նաև աչքի ընկնող գործիչ է եղել հեղափոխության ժամանակ, որը վայելում է շատ շատերի անվերապահ աջակցությունը: Այդ թվում՝ քաղաքական ամենաբարձր էշելոններում է վայելում աջակցություն: Նաև ունի իրեն հավատացողների հսկայական «բանակ»:
Եվ հետևաբար՝ նա «բոլոր կողմերից պաշտպանված է», ինչպես ասում են:
Իսկ ԱԱԾ-ն ոչ ջրիկ կառույց է, ոչ էլ «ինքնասպան» մարդկանց խումբ, որ առանց լուրջ հիմքերի Դավիթի նման մեկին մեղադրանք առաջադրի, հետևաբար՝ մի լուրջ հիմք պետք է ունենան:
ՖԲ-ում ասվում է, որ, գուցե, Դավիթի գլխին սարքվել է իր իսկ ենթակաների կողմից: Իրոք, շատ հնարավոր է: Նրա գլխին, գուցե, հեշտորեն կսարքվեր իր իսկ ղեկավարած համակարգի ավելի հին «գայլերի» կողմից, եթե հաշվի առնենք նրա ազնիվ «միամտությունը»: Ես էլ չեմ կարողանում հանգիստ հավատալ էդ մարդու անազնվությանը:
Բայց, կարծում եմ, ամեն ինչ կպարզվի: Պետք չի շտապել և նախապես ԱԱԾ-ին «խարույկ հանել»: Հիշեցնեմ նաև, համենայնդեպս, որ հետհեղափոխական Հայաստանում ԱԱԾ-ն ամենալավ աշխատող կառույցի տպավորությունն է թողնում: Դեռևս»: