ԱՄՆ Կոլորադո նահանգի Դենվեր քաղաքի բանտախցերից մեկում ինքնուրույն ծննդաբերած կինը դատի է տվել ոստիկանությանը: Դիանա Սանչեսը 2018 թվականին գտնվել է կալանավայրում խարդախության մեղադրանքով: Անազատության 14-րդ օրը նրա մոտ ծննդաբերական գործընթաց է սկսվել, նա կանչել է հսկիչներին, կալանավայրի բժշկին, սակայն ոչ ոք նրան օգնության չի շտապել: Միայն պոլիէթիլենային տակաշոր են տվել ու դուռը փակել:

5 ժամ տևած տառապանքներից հետո Սանչեսը ծննդաբերել է տղա երեխայի՝ հղիության 8-րդ ամսում: Միայն երեխայի ծնվելուց հետո բանտախուց է մտել բուժաշխատողն ու օգնություն ցուցաբերել:

Դատական հայցից հետո Դենվերի ոստիկանությունը հայտարարել է, թե փոխել է իրենց քաղաքականությունը և մշակել օրենք, որով կալանավայրում գտնվող բոլոր հղիները կարող են անհապաղ տեղափոխվել բուժհաստատություն հղիության ցանկացած ժամկետում: